Si u zhvilluan zgjedhjet në veri?

23 prill 2023

Radio Evropa e Lirë

Më 23 prill, në Mitrovicë të Veriut, Leposaviq, Zveçan dhe Zubin Potok u mbajtën zgjedhjet e parakohshme lokale.
Sipas KQZ-së, Lëvizja Vetëvendosje fitoi garën për kryetar komune në Mitrovicë të Veriut dhe Leposaviq. Partia Demokratike e Kosovës fitoi në Zveçan dhe Zubin Potok.
Dalja në zgjedhje ishte 3.47 për qind dhe nuk u raportua për ndonjë incident.
Lista Serbe - partia më e madhe e serbëve në Kosovë - nuk mori pjesë në zgjedhje dhe u bëri thirrje qytetarëve serbë që ta bojkotojnë procesin. Thirrje të ngjashme bëri edhe Beogradi zyrtar.
Komunat në veri mbetën pa kryetarë nga nëntori i vitit të kaluar, kur përfaqësuesit serbë në atë zonë dhanë dorëheqje nga vendet e tyre të punës, për shkak të mospajtimit me një vendim të Qeverisë së Kosovës për riregjistrimin e makinave me targa ilegale serbe.

07:15 23.4.2023

Nis hapja e vendvotimeve

Pak minuta pas orës 7:00 kanë nisur të hapen disa qendra të votimit në pjesën veriore të Kosovës, ku sot zhvillohen zgjedhjet e parakohshme lokale.

Në disa të tjera ka vonesa, për shkak të, siç raportohet, mosmbërritjes së materialit zgjedhor.

07:22 23.4.2023

Pamje nga një vendvotim në kontejner në Mitrovicë të Veriut

07:33 23.4.2023

Pamje nga disa vendvotime në veri të Kosovës

08:07 23.4.2023

KQZ: Hapen të gjitha qendrat e votimit në veri

Komisioni Qendror i Zgjedhjeve njoftoi se të 19 qendrat e votimit në pjesën veriore të Kosovës, ku sot mbahen zgjedhjet e parakohshme lokale, janë hapur.

KQZ-ja mbajti konferencën e parë në orën 8:00 dhe paralajmëroi at të radhës për në orën 11:30.

Shfaq më shumë