DnV: Zgjedhjet kaluan pa asnjë incident
Organizata Demokracia në Veprim (DnV) tha se refuzimi i partive serbe dhe tërheqja e kandidatëve nga gara zgjedhore bëri që zgjedhjet e parakohshme lokale në katër komunat në veri të Kosovës, të bojkotoheshin nga votuesit serbë.
DnV ka vëzhguar zgjedhjet lokale të mbajtura të dielën në Mitrovicë të Veriut, Leposaviq, Zveçan dhe Zubin Potok.
Përveç zgjedhjes së kryetarëve të rinj, qytetarët në këto komuna, të banuara me shumicë serbe, votuan edhe për përbërjet e reja të asambleve komunale në Leposaviq dhe Zveçan.
“Sa i përket administrimit të zgjedhjeve, është vërejtur një improvizim i procesit zgjedhor, duke nisur nga zhvillimi i zgjedhjeve në kontejnerë, që kanë zëvendësuar rreth 70 për qind të qendrave të zakonshme të votimit”, tha DnV.
Lajmin e plotë mund ta lexoni KËTU
Përfundon procesi zgjedhor në veri
Në katër komunat në veri të Kosovës kanë nisur të mbyllen qendrat e votimit për zgjedhjet e parakohshme lokale.
Qytetarët e Mitrovicës së Veriut, Leposaviqit, Zveçanit dhe Zubin Potokut zgjodhën sot kryetarët e rinj.
Në Zveçan dhe Leposaviq qytetarët u votua po ashtu për të zgjedhur përbërjet e reja të asambleve komunale.
Dalja në zgjedhje deri në orën 15:00 ishte 2.4 për qind.
Procesi zgjedhor u bojkotua nga partia kryesore e serbëve në Kosovë, Lista Serbe – që ka mbështetjen e Beogradit zyrtar – e cila po ashtu bëri thirrje për bojkot.
Autoritetet nuk kanë raportuar për ndonjë pengim të procesit zgjedhor.
Fotografi nga qendrat e votimit në veri
Në katër qendra të votimit në Zubin Potok nuk ka votuar asnjë qytetar për zgjedhjet e parakohshme lokale.
Sipas të dhënave të KQZ-së, që i referohen daljes në zgjedhje deri në orën 15:00, pjesëmarrja në procesin zgjedhor ka qenë 2.4 për qind e qytetarëve me të drejtë vote.
Qendra të votimit pa asnjë votues
Në katër qendra votimi në Zubin Potok, nuk ka votuar asnjë qytetar për zgjedhjet e parakohshme lokale, raporton gazetari i Radios Evropa e Lirë, Shkelqim Hysenaj, i cili po përcjell nga afër zgjedhjet në veri, bashkë me kameramanin Bujar Tërstena.
Sipas të dhënave të Komisionit Qendror të Zgjedhjeve në qendrën e votimit në Veli Breg të Zubin Potokut janë të regjistruar 4.111 qytetarë me të drejtë vote. Që nga hapja e kësaj qendre të improvizuar të votimit – të vendosur në kontejner – asnjë qytetar nuk e ka shfrytëzuar të drejtën e votës.
Situatë e njëjtë është edhe në qendrën e improvizuar të votimit në Bërnjak, në afërsi të kufirit mes Kosovës dhe Serbisë. Sipas të dhënave të KQZ-së, në këtë qendër votimi mund të votojnë 629 votues.
Ndërkaq, në Jasenovik, në listën e votuesve janë 387 persona.
Në Çabër, ku banojnë edhe shqiptarë, deri në orën 17:00 kanë votuar më pak se 200 qytetarë. Në këtë qendër votimi, sipas KQZ-së, janë të regjistruar 1.534 votues.