Si u zhvilluan zgjedhjet në veri?

• Deri në orën 11:00 kanë votuar gjithsejtë 313 qytetarë nga mbi 45.000 me të drejtë vote.
• Zgjedhjet e parakohshme lokale mbahen sot në komunat veriore të Kosovës me shumicë serbe: Mitrovicë e Veriut, Zveçan, Zubin Potok dhe Leposaviq.
• Kryetari i Komisionit Qendror të Zgjedhjeve, Kreshnik Radoniqi, u ka bërë thirrje qytetarëve të dalin në votime dhe t’i zgjedhin përfaqësuesit e tyre legjitimë. Thirrje të ngjashme kanë bërë më herët edhe presidentja dhe kryeministri i Kosovës.
• Në zgjedhje nuk është duke marrë pjesë Lista Serbe, partia më e madhe e serbëve në Kosovë, e cila, sikurse Beogradi zyrtar, ka bërë thirrje për bojkotimin e gjithë procesit.
• Me gjithë kundërshtimet e Beogradit, Shtetet e Bashkuara dhe Bashkimi Evropian kanë mbështetur zhvillimin e procesit zgjedhor në veri.

Presidenti i Serbisë, Aleksandar Vuçiq, i cilësoi zgjedhjet në veri të Kosovës si “zgjedhje pushtuese”.

Duke folur gjatë një vizite në qytetin Donja Gradina në Bosnje dhe Hercegovinë, Vuçiq tha se pushteti në veri të Kosovës synon të vendoset nga ata që, siç u shpreh ai, nuk jetojnë atje.

“Deri në këto momente, vetëm disa serbë kanë dalë në të katër komunat së bashku. Serbët nuk do t’iu shërbejnë interesave të të tjerëve, duan t’iu shërbejnë interesave të tyre, duan paqen, por duan të luftojnë për interesat e popullit të tyre”, tha Vuçiq.

Beogradi zyrtar dhe Lista Serbe - partia më e madhe e serbëve në Kosovë - kanë bërë thirrje për bojkotimin e procesit zgjedhor në veri.

Duke shpërndarë fotografi të disa vendvotimeve në veri të Kosovës, kryeministrja e Serbisë, Ana Bërnabiq, tha se ato përshkruajnë në të vërtetë “sundimin e ligjit” dhe kuptimin e vërtetë të “zgjedhjeve demokratike”, të mbështetura nga komuniteti ndërkombëtar.

“Zgjedhje - të lira dhe të ndershme, me forca të armatosura dhe me mjete të blinduara! Kjo është Evropa në shekullin 21”, shkroi Bërnabiq në Twitter.

“Kjo tashmë bëhet normë e re demokratike, e prezantuar dhe e mbështetur nga krijuesit e Republikës së Kosovë”, shtoi ajo.

Zgjedhjet e parakohshme lokale po mbahen sot në komunat me shumicë serbe në veri të Kosovës - Mitrovicë e Veriut, Zubin Potok, Leposaviq dhe Zveçan.

Lajmin e plotë mund ta lexoni këtu.

Albert Krasniqi, nga Organizata Demokraci Plus, me seli në Prishtinë, thotë për Radion Evropa e Lirë se pjesëmarrja e ulët e qytetarëve në zgjedhjet e parakohshme lokale në komunat veriore të Kosovës, nuk e bën të pamundur ligjërisht themelimin e institucioneve, por, sipas tij, ato nuk do të jenë legjitime.

Ky proces, thotë Krasniqi, do të rezultojë me institucione jofunksionale.

Ai, po ashtu, thotë se përmes bojkotit të zgjedhjeve, po përçohet mesazhi i presidentit serb, Aleksandar Vuçiq, te komuniteti ndërkombëtar, se ai e ka kontrollin efektiv në këtë pjesë të territorit të Kosovës.

Me mbështetjen e tij, Lista Serbe - partia më e madhe e serbëve në Kosovë - nuk po merr pjesë në zgjedhjet e parakohshme lokale në Mitrovicë të Veriut, Zveçan, Zubin Potok dhe Leposaviq, dhe ka bërë thirrje për bojkotimin e gjithë procesit.

Sipas Komisionit Qendror të Zgjedhjeve në Kosovë, pjesëmarrja e votuesve deri në orën 11:00 ka qenë si vijon:

• Leposaviq: 28 votues, apo 0.21%
• Zubin Potok: 65 votues, apo 1%
• Zveçan: 29 votues, apo 0.41%
• Mitrovicë e Veriut: 191 votues, apo 1.05%

Të drejtë vote, sipas KQZ-së, kanë 45.095 qytetarë.