Kryetari i KQZ-së: Qytetarët të dalin në votime, të ndërtojnë institucione legale
Kryetari i Komisionit Qendror të Zgjedhjeve në Kosovë, Kreshnik Radoniqi, i ftoi qytetarët në veri të Kosovës që ta ushtrojnë të drejtën e tyre të votës.
“Në këtë mënyrë t’i zgjedhin përfaqësuesit e tyre dhe t’i ndërtojnë institucionet legale demokratike”, tha Radoniqi gjatë një vizite në qendrën e votimit në Lagjen e Boshnjakëve në Mitrovicën e Veriut.
Në këtë vendvotim, sipas tij, deri më tash kanë votuar rreth 60 persona.
“Procesi është duke shkuar mirë dhe nuk ka ndonjë problem”, tha Radoniqi.
Zgjedhjet e parakohshme lokale janë duke u mbajtur në katër komuna me shumicë serbe në veri të Kosovës: Mitrovicë e Veriut, Zveçan, Zubin Potok dhe Leposaviq.
Pjesëmarrja, megjithatë, pritet të jetë e ulët, pas thirrjeve të partisë më të madhe të serbëve të Kosovës – Lista Serbe – për bojkotimin e procesit.
Kjo parti ka kërkuar fillimisht formimin e Asociacionit të komunave me shumicë serbe në Kosovë - për të cilën gjë Prishtina dhe Beogradi janë pajtuar dhjetë vjet më parë - dhe tërheqjen e njësive speciale të Policisë së Kosovës nga veriu i vendit.
Në qëndrimin e saj, ajo ka pasur mbështetjen e Beogradit.
Veriu shkon në zgjedhje me vetëm një kandidate serbe
Alleksandar Jabllanoviq, kandidat i Partisë së Serbëve të Kosovës për kryetar të Leposaviqit, është tërhequr nga gara vetëm tri ditë përpara zgjedhjeve të 23 prillit. Në garë mbeten dhjetë kandidatë, në mesin e tyre vetëm një nga komuniteti serb. Të anketuar nga Radio Evropa e Lirë, disa qytetarë në veri të Kosovës thonë se nuk ka atmosferë zgjedhore në komunat e tyre.
Pjesëmarrje e zbehtë në votime
Korrespondentët e Radios Evropa e Lirë në terren raportojnë për pjesëmarrje të ulët në votime për zgjedhjet lokale në veri të Kosovës.
Gazetarja Sandra Cvetkoviq thotë se në një vendvotim në Zveçan, ku ka votuar kandidatja për kryetare e kësaj komune, Sllagjana Pantoviq, nuk ka votuar deri më tash askush tjetër përpos saj.
Ngjashëm raportohet të jetë situata edhe në komunat e tjera: Mitrovicë e Veriut, Zubin Potok dhe Leposaviq.
Sipas korrespondentëve, votues shihen vetëm në ato lagje ku jeton komuniteti shqiptar.
Policia: Kemi marrë masa për siguri dhe mbarëvajtje të zgjedhjeve
Policia e Kosovës përsëriti të dielën se ka ndërmarrë të gjitha veprimet dhe masat e nevojshme, për të ofruar siguri dhe mbarëvajtje të procesit zgjedhor në komunat veriore të Kosovës.
Në Mitrovicë të Veriut, Zveçan, Zubin Potok dhe Leposaviq - që të gjitha komuna të banuara me shumicë serbe - po mbahen zgjedhjet e parakohshme lokale.
Lista Serbe, partia më e madhe e serbëve të Kosovës, e cila mbështetet nga Beogradi, nuk merr pjesë në zgjedhje dhe u ka bërë thirrje qytetarëve që ta bojkotojnë procesin.
Për më shumë lexoni këtu.