Situata me koronavirus, ministrja Hajdari nxjerr disa urdhëresa
Ministrja e Ekonomisë, Punësimit, Tregtisë, Industrisë, Ndërmarrësisë dhe Investimeve Strategjike në Kosovë, Rozeta Hajdari, ka nxjerrë disa urdhëresa për t’i trajtuar ankesat e qytetarëve dhe për të zbatuar vendimet e Qeverisë së Kosovës në lidhje me koronavirusin.
Urdhëresat e ministres Hajdari, sipas një njoftimi për media, kanë të bëjnë me menaxhimin e çmimeve, sigurimin e ofrimit të shërbimeve të komunikimeve elektronike dhe shërbimeve postare gjatë emergjencës së shëndetit publik, si dhe me zbatimin e masave ndaj veprimtarive ekonomike lidhur me situatën e krijuar.
Urdhëresa e parë për menaxhimin e çmimeve, përveç tjerash, obligon inspektorët e tregut që të shqyrtojnë secilën ankesë të konsumatorëve lidhur me mosrespektimin e të drejtave të tyre ekonomike dhe ligjore nga ana e operatorëve ekonomikë.
Tek ofrimi i shërbimeve të komunikimit elektronik, përmes urdhëresës, kërkohet nga të gjithë ofruesit e shërbimeve dhe rrjeteve të komunikimit, të sigurojnë qasje të pandërprerë në komunikime elektronike në tërë territorin e Kosovës.
Në Kosovë, deri më tani janë konfirmuar 19 raste me koronavirusin që shkakton sëmundjen COVID-19.
Jeni të izoluar? Ja, disa këshilla:
Si të përballeni me stresin gjatë shpërthimit të koronavirusit?
Shënohet viktima e dytë nga Covid-19 në Shqipëri
Edhe një person ka humbur jetën si pasojë e koronavirusit në Shqipëri, duke e çuar në dy numrin e viktimave në këtë vend.
Sipas Ministrisë së Shëndetësisë, 66-vjeçari nga Lushnja ishte në gjendje të rëndë shëndetësore dhe ishte shtruar në shërbimin infektiv para disa ditësh.
Eugena Tomini, nga Instituti i Publik i Shqipërisë, ka njoftuar se pacienti vuante nga disa sëmundje shoqëruese.
“Prej disa ditësh, pacienti ishte i intubuar në respirator të drejtuar, në gjendje të rëndë shëndetësore”, ka thënë Tomini.
- Artikullin e plotë mund ta lexoni këtu.
Kurti shkarkon ministrin Veliu
Kryeministri i Kosovës, Albin Kurti, tha se ka shkarkuar nga detyra ministrin e Punëve të Brendshme dhe Administratës Publike, Agim Veliu.
Në një njoftim për media thuhet se Veliu, për televizionin Klan Kosova, “u deklarua kundër qëndrimit të kryeministrit të Republikës së Kosovës mbi shpalljen e gjendjes së jashtëzakonshme” për shkak të situatës me koronavirus dhe se Veliu ka përhapur panik, duke thënë se “numri i të prekurve po rritet prej ore në orë”.
Sipas Kurtit, “as Ministria e Shëndetësisë e as Instituti Kombëtar i Shëndetësisë Publike nuk kanë thënë se numri i të infektuarve me COVID-19 po rritet nga ora në orë”.
Përmes deklaratave të bëra publikisht, “por jo edhe të mbështetura me qëndrime të tij në mbledhje të brendshme”, Veliu ka “dëshmuar mungesë të theksuar lidershipi dhe ka minuar hapur punën e qeverisë”, thuhet në njoftimin e zyrës së Kurtit.
“Në këto rrethana, jam i detyruar të veproj, andaj edhe kam vendosur të shkarkoj z. Veliu nga detyra e ministrit të Ministrisë së Punëve të Brendshme dhe Administratës Publike”, tha Kurti, duke shtuar se deri në zgjedhjen e ministrit të ri, detyrën do ta kryejë zëvendësministri aktual, Xhelal Sveçla.
- Lajmin e zgjeruar mund ta lexoni këtu.