Tregjet botërore të aksioneve shënojnë rritje
Derisa investitorët po monitorojnë nga afër rezultatet e zgjedhjeve në SHBA, indekset standarde të aksioneve në Japoni dhe Australi shënuan rritje të mërkurën në mëngjes.
Dollari amerikan, ndërkaq, ishte më lart kundrejt monedhave të tjera kryesore.
Rezultati i zgjedhjeve pritet të ketë ndikim të madh në ekonominë globale, veçanërisht në Azi.
Por, nuk është ende e qartë nëse rezultati i zgjedhjeve do të dihet gjatë orarit të tregtimit në Azi, pasi numërimi i votave në shtetet e papërcaktuara mund të marrë disa ditë kohë.
Në pritje të rezultateve nga shtetet e papërcaktuara
Gjysma e shteteve në SHBA i shpallën rezultatet në përputhje me parashikimet, por ato nuk janë ende të qarta në shtetet e papërcaktuara.
Siç pritej, Trump u shpall fitues në: Alabama, Arkansas, Florida, Indiana, Kentaki, Luiziana, Misisipi, Misuri, Montana, Nebraska (dy qarqe), Ohajo, Oklahoma, Karolinë e Jugut, Dakotë e Jugut, Tenesi, Teksas, Jutah, Uest Virxhinia dhe Uajoming.
Harris, gjithashtu siç pritej, u shpall fituese në: Kolorado, Konektikat, Dellauer, Illinois, Merillend, Masçusets, Nju Hempshir, Nju Xhërsi, Nju Jork, Rod Ajllënd dhe Vermont.
Rezultatet mbeten ende të paqarta në shtetet e papërcaktuara si: Arizona, Karolina e Veriut, Xhorxhia, Miçigani, Nevada, Pensilvania dhe Uiskonsini.
Qendrat e votimit u mbyllën në më shumë se 40 shtete
Nga 50 shtetet e SHBA-së, ku u zhvilluan zgjedhjet presidenciale, qendrat e votimit u mbyllën në më shumë se 40 prej tyre, përfshirë Qarkun e Kolumbias.
Deri më tani, Harris dhe Trump siguruan fitore në shtetet ku pritej.
Rezultati përfundimtar do të varet nga shtatë shtetet e papërcaktuara: Pensilvania, Xhorxhia, Karolina e Veriut, Miçigani, Arizona, Uiskonsini dhe Nevada.
Qendrat e fundit të votimit do të mbyllen në 01:00, që me orën e Kosovës i bie 07:00, më 6 nëntor.
Rruga deri te 270 votat
SHBA-ja përfshin 50 shtete dhe shumica e tyre votojnë për të njëjtën parti politike në çdo palë zgjedhje.
Por, janë shtatë shtete - të njohura si të papërcaktuara - ku secili kandidat mund të fitojë.
Këto shtete janë: Nevada, Arizona, Karolina e Veriut, Xhorxhia, Uiskonsini, Miçigani dhe Pensilvania.
Shtetet me më shumë njerëz vlejnë më shumë, pasi përkthehen në vota nga Kolegji Zgjedhor.
Kolegji Zgjedhor ka gjithsej 538 vota.
President i ardhshëm do të jetë kandidati që merr 270 ose më shumë vota të Kolegjit Zgjedhor.
Të dy kandidatët do të duhet të fitojnë në së paku tri shtete të papërcaktuara për të dalë në epërsi.
