Mbi gjysma e komunave shkojnë në balotazh

PZAP pranon 21 ankesa

Paneli Zgjedhor për Ankesa dhe Parashtresa (PZAP) në Kosovë njoftoi se deri rreth orës 18:30, ka pranuar 21 ankesa lidhur me zgjedhjet lokale.

Mulë Desku, kryesues i Sekretariatit të PZAP-it, tha për Radion Evropa e Lirë se ankesat kryesisht kanë të bëjnë me pretendimin se është thyer heshtja zgjedhore.

“Tash për tash nuk kemi ankesa nga individë, vetëm nga subjektet politike dhe shoqëria civile”, tha Desku.

Ai po ashtu bëri të ditur se gjatë të shtunës janë pranuar katër ankesa lidhur me pretendimin për thyerjen e heshtjes zgjedhore.

Arrestohen dy persona, dyshohet se tentuan të blejnë vota

Policia e Kosovës ka arrestuar dy persona në Komunën e Malishevës si të dyshuar për veprën penale “Dhënia ose marrja e ryshfetit në lidhje me votimin”.

Në një njoftimin e Prokurorisë Speciale të Republikës së Kosovës, thuhet se të arrestuarit janë një vëzhgues dhe një komisioner nga qendra e vendvotimit në gjimnazin “Hamdi Berisha” nën dyshimet për shitblerje të votës.

Me urdhër të Prokurorit të Shtetit, të njëjtit janë në ndalim.

“Prokurori i Shtetit dhe Policia e Kosovës mbeten të përkushtuar në realizimin e detyrave dhe përgjegjësive të tyre ligjore, në mënyrë profesionale, transparente dhe të paanshme karshi qytetarëve dhe vendit, andaj inkurajojmë të gjithë qytetarët që të bashkëpunojnë me Prokurorinë e Shtetit dhe Policinë e Kosovës dhe njëherësh të raportojnë për ç’do rast të kundërligjshëm që ndërlidhet me sigurinë dhe procesin zgjedhor”, thuhet në njoftim.

Zgjedhjet përmes fotove

Teksa ka mbetur vetëm një orë deri në mbylljen e vendvotimeve për zgjedhjet lokale, Radio Evropa e Lirë ju sjellë fotografi të qytetarëve duke ushtruar të drejtën e tyre të votimit.

Në Kosovë, më 17 tetor qytetarët zgjedhin kryetarët e rinj dhe asambletë komunale në 38 komuna. Vendvotimet janë hapur në ora 07:00 dhe mbyllen në ora 19:00. Në këto zgjedhje, qytetarët duhet të respektojnë masat kundër koronavirusit, siç janë: mbajtja e maskave, dezinfektimi i duarve dhe mbajtja e distancës. Informacionet në kohë reale rreth zgjedhjeve i gjeni KËTU

Numër më i madh i votuesve nga diaspora

Sipas të dhënave të Komisionit Qendror të Zgjedhjeve, numri i qytetarëve me të drejtë vote jashtë vendit, të cilët kanë arritur të regjistrohen suksesshëm si votues jashtë Kosovës është rritur në zgjedhjet komunale 2021, krahasuar me zgjedhjet e vitit 2017.

Në zgjedhjet lokale të 22 tetorit 2017, numri i votuesve nga jashtë të regjistruar suksesshëm ishte 10,476, derisa në zgjedhjet që po mbahen më 17 tetor 2021, është 15,532 votues.

Të dielën, qytetarët e Kosovës po votojnë për të zgjedhur kryetarët dhe asambletë komunale në 38 komuna.