Mbi gjysma e komunave shkojnë në balotazh

Lexues të nderuar,

Këtu po e mbyllim mbulimin drejtpërdrejtë të raundit të parë të zgjedhjeve lokale në Kosovë.

Faleminderit që na ndoqët!

Katërmbëdhjetë persona të ndaluar lidhur me procesin zgjedhor

Prokurori i Shtetit ka njoftuar në procesin zgjedhor të 17 tetorit janë regjistruar gjashtë raste me 14 persona të ndaluar.

Personat e ndaluar, sipas prokurorisë dyshohen për dhënie ose marrje të ryshfetit në lidhje me votimin, falsifikim të rezultateve të votimit, pengim të procesit të votimit si dhe për veprën cenim i fshehtësisë së votimit.

Personat e ndaluar janë nga Komuna e Kllokotit, Suharekës, Skenderajt, Malishevës dhe Fushë Kosovës.

Prokurori i Shtetit thotë se do të vazhdojë të përcjellë procesin zgjedhor deri në numërimin përfundimtar të të gjitha votave.

PDK: Pa balotazh fituam pesë komuna

Partia Demokratike e Kosovës (PDK) ka shpallur fitoren në raundin e parë të zgjedhjeve në pesë komuna: në Mitrovicë të Jugut, Ferizaj, Skenderaj, Kaçanik dhe në Han të Elezit.

Kryetari i PDK-së, Memli Krasniqi në një konferencë për media tha se edhe në komunat ku janë në balotazh si në Prizren, Drenas, Vushtrri, Klinë e të tjera do ta fitojnë garën në raundin e dytë.

“PDK-ja në këto zgjedhje lokale ka shënuar rezultat të jashtëzakonshëm. Qytetarët u bashkuan për të mbajtur e për rikthyer qeverisje të mira në komunat e Kosovës me PDK-në. PDK-ja ka qenë e fortë dhe mbetet e fortë dhe do të bëhet edhe më e fortë”, tha Krasniqi.

I pyetur se me kënd do ta përkrahin në garën për Prishtinën pasi PDK-ja nuk do të jetë në balotazh me kandidatin e tyre, Uran Isamilin, Krasniqi tha se i mbetet Ismailit që të vendosë.

LDK: Prijmë dhe jemi në garë në 11 komuna

Kryetari i Lidhja Demokratike e Kosovës (LDK) Lumir Abdixhiku ka thënë se në këto zgjedhje lokale, LDK-ja prin ose është në garë në 11 komuna.

“LDK këtë mbrëmje të 17 tetorit e sheh si datë të rikthimit të madh. Ky rikthim është arritje, por edhe përgjegjësi të cilën duhet ta ushtrojmë me kujdes”, tha Abdixhiku.

Në Prishtinë, Abdixhiku ka thënë se kandidati Përparim Rama do të jetë në balotazh.

Ai ka vlerësuar procesin e zgjedhjeve lokale të 17 tetorit si një proces demokratik dhe të qetë.

LDK-ja thotë se në Pejë, Lipjan, Fushë Kosovë kandidatët e saj kanë fituar garën.

Ndërkaq, me vota sipas LDK-së, kandidatët e saj janë në epërsi në Podujevë, Viti, Istog Vushtrri dhe Dragash.