Haradinaj bën thirrje për pjesëmarrje në votim
Kandidati për kryetar të Prishtinës nga Aleanca për Ardhmërinë e Kosovës, Daut Haradinaj, ka thënë pas votimit se procesi i zgjedhor po shkon qetë dhe u ka bërë thirrje të gjithë qytetarëve që të votojnë.
Ai e ka konsideruar organizimin e këtyre zgjedhjeve si “më të mirin nga paslufta”.
KQZ: Deri në orën 11:00 votuan 8.2 për qind e qytetarëve
Komisioni Qendror i Zgjedhjeve (KQZ) ka bërë të ditur se deri në orën 11:00 në zgjedhjet lokale të 17 tetorit kanë votuar 8.2 për qind e qytetarëve.
Kjo i bie që kanë votuar rreth 152 mijë qytetarë.
Të dhënat janë të bazuara nga informacionet e marra në 98 për qind të vendvotimeve.
Kryetari i KQZ-së, Kreshnik Radoniqi, ka thënë se procesi zgjedhor është duke vazhduar i qetë dhe pa incidente që mund të pengojnë procesin zgjedhor.
Voton presidentja Osmani
Presidentja e Kosovës, Vjosa Osmani, ka thënë të dielën se zgjedhjet lokale përbëjnë një proces të rëndësishëm për jetën e qytetarëve.
“Sot, qytetarët tanë, pa asnjë dallim, në çdo cep të vendit tonë, votojnë për kualitetin e jetës së tyre, votojnë për komunat e tyre, për udhëheqësinë, e cila do ta determinojë sesi në katër vjetët e ardhshëm do të jetë jeta në komunat ku ata jetojnë”, ka thënë Osmani pas votimit.
Rama: I lumtur që jetoj në një shtet demokratik
Kandidati i Lidhjes Demokratike të Kosovës për kryetar të Prishtinës, Përparim Rama, ka thënë pas votimit se është i lumtur që jeton në një shtet demokratik dhe secili ka të drejtë të votojë dhe të marrë përgjegjësi për të ardhmen e qytetit.
Facebook Forum