Stoltenberg: Aleatët perëndimorë duhet të 'qëndrojnë së bashku' kundër Rusisë
Vendimi i presidentit rus, Vladimir Putin, për të vënë në gatishmëri forcat e tij bërthamore përbën sjellje "të papërgjegjshme", tha NATO të dielën, më 27 shkurt.
"Kjo është një retorikë e rrezikshme. Kjo është një sjellje e papërgjegjshme", tha sekretari i Përgjithshëm i Aleancës, Jens Stoltenberg, raportoi CNN.
Shtetet e Bashkuara të Amerikës dhe Evropa duhet "të qëndrojnë vërtet së bashku" në përgjigje të agresionit ushtarak të Rusisë dhe "retorikës kërcënuese", tha Stoltenberg, duke shtuar se aleanca "nuk dëshiron luftë".
Ndër zhvillimet më të fundit rreth luftës në Ukrainë:
- Presidenti rus, Vladimir Putin ka urdhëruar ushtrinë e tij që të vendosë forcën parandaluese – një referencë për njësitet që përfshin edhe krahun bërthamor – në gatishmërinë më të lartë, duke cituar deklaratat agresive të liderëve të NATO-s dhe sanksionet ekonomike
- Shtetet e Bashkuara e kanë konsideruar këtë hap si përshkallëzim të papranueshëm
- Sekretari i Përgjithshëm i NATO-s, Jens Stoltenberg, ka thënë se aleatët perëndimorë duhet të “qëndrojnë së bashku” kundër Rusisë
- Zyrtarët ukrainas dhe ata rusë pritet të takohen për bisedime në kufirin e Ukrainës me Bjellorusinë, ka thënë zyra e presidentit ukrainas, Volodymyr Zelenskyi.
- Kombet evropiane dhe Kanadaja kanë mbyllur hapësirat e tyre ajrore për aeroplanë rusë
- Japonia do t’iu bashkohet Shteteve të Bashkuara dhe atyre të Perëndimit për të bllokuar qasjen e disa bankave ruse në sistemin ndërkombëtar të pagesave SWIFT
- Sekretarja e Jashtme britanike, Lizz Truss ka thënë se lufta mund të jetë fillimi i fundit të Putinit
- Pajisjet ushtarake ruse kanë hyrë në qytetin e dytë më të madh në Ukrainë, Harkiv, në ditën e katërt të luftës
- Guvernatori i Harkivit ka thënë ndërkohë që forcat ukrainase kanë rikthyer kontrollin e plotë të qytetit
- Kryetari i Kievit, Vitali Klitschko, ka thënë se në kryeqytetin ukrainas nuk ka trupa ruse
- Rusia ka sulmuar objekte ukrainase të naftës dhe gazit, duke nxitur shpërthime të mëdha
- Ukraina ka dorëzuar ankesë në Gjykatën Penale Ndërkombëtare, duke cituar supozimet për gjenocid kundër Kievit
- Në dhjetëra qytete në botë është protestuar kundër luftës në Ukrainë
- Papa Françesku ka bërë thirrje për dhënien fund të luftës
Qindra protestues kundër luftës të arrestuar nga policia ruse
Qytetarët rusë në disa qytete, duke përfshirë Moskën, Shën Petersburgun dhe Samaran, kanë dalë sërish në rrugë më 27 shkurt për të protestuar kundër pushtimit rus të Ukrainës.
Demonstruesit marshuan në qendrat e qyteteve, duke brohoritur "Jo luftës".
Sipas OVD-Info, një organizatë jofitimprurëse që monitoron arrestimet e policisë në mbarë vendin, pasditen e 27 shkurtit policia ruse arrestoi 461 qytetarë në 32 qytete për pjesëmarrje në demonstratat kundër luftës.
Aktivistët e të drejtave kanë thënë se nga 24 deri më 26 shkurt, më shumë se 3,000 rusë u arrestuan për protestat, në të cilat kundërshtonin luftën e Rusisë kundër Ukrainës.
Ukraina: Urdhri i Putinit për forcat bërthamore, taktikë presioni
Ukraina tha të dielën se urdhri i presidentit rus, Vladimir Putin, për të vendosur forcat bërthamore ruse në gatishmëri të lartë ishte llogaritur për të ushtruar presion në fillimin e bisedimeve, porse Kievi nuk do të mashtrohej.
Duke folur në një konferencë, ministri i Jashtëm, Dmytro Kuleba, tha gjithashtu se Rusia kishte hequr dorë nga parakushtet e saj për bisedime pasi pësoi pengesa ushtarake. Ukraina do të dëgjonte atë që Rusia kishte për të thënë, tha ai.
