Të 50 shtetet e SHBA-së preken nga koronavirusi
Koronavirusi ka prekur të 50 shtetet e SHBA-së, pasi Virxhinia Perëndimore ka raportuar tashmë rastin e saj të parë.
Duke njoftuar për pacientin e parë me COVID-19, guvernatori i këtij shteti, Jim Justice, tha: “E dinim se kjo do të vinte”.
Mbi 6,300 njerëz janë të infektuar me koronavirus në SHBA, ndërsa 108 pacientë kanë humbur jetën.
Në gjithë botën, gati 200,000 vetë janë infektuar dhe afro 8,000 të tjerë kanë vdekur.
Zyrtarë të Nju Jorkut thanë se janë duke konsideruar izolimin total, si masë për frenimin e koronavirusit.
Kryetari Bill de Blasio tha se do të vendosë brenda dy ditësh nëse do t’i urdhërojë 8.5 milionë banorët e qytetit të vetizolohen.
Një vendim i tillë mund t’i kufizojë në masë të madhe njerëzit, duke i lejuar ata të dalin nga shtëpitë vetëm për të blerë ushqime ose ilaçe dhe në disa raste të tjera.
Presidenti Donald Trump tha në një konferencë për media të martën se kufizimet në udhëtime brenda SHBA-së janë po ashtu opsion.
Von der Leyen: Politikanët e nënvlerësuan koronavirusin
Udhëheqësit politikë “e nënvlerësuan” shkallën e rrezikut që paraqet koronavirusi, tha presidentja e Komisionit Evropian, Urusla von der Leyen.
“Mendoj se të gjithë ne, që nuk jemi ekspertë, e kemi nënvlerësuar fillimisht koronavirusin”, tha von der Leyen në një intervistë për gazetën gjermane, Bild.
“Tani, është e qartë se ky është një virus që do të na mbajë të zënë për një kohë të gjatë”, tha ajo.
Bashkimi Evropian ka marrë vendim të martën që të ndalojë hyrjen e udhëtarëve prej jashtë bllokut, për 30 ditë, në përpjekje për të frenuar përhapjen e koronavirusit.
- Lajmin e zgjeruat mund ta lexon këtu.
Australia me masa të reja kundër koronavirusit
Australia i ndaloi tubimet “jothelbësore” të më shumë se 100 njerëzve, në përpjekje për të frenuar pandeminë e koronavirusit.
Kryeministri Scott Morrison njoftoi për masat e reja të mërkurën.
Por, ai tha se shkollat, transporti publik dhe sheshet publike do të mbeten të hapura.
Australia ka mbi 450 njerëz të infektuar me koronavirus, ndërsa pesë pacientë atje kanë humbur jetën.
"Ne nuk e kemi parë këtë lloj gjëje në Australi që nga fundi i Luftës së Parë Botërore. Por, do t’ia dalim së bashku”, tha Morrison, duke i bërë thirrje publikut të mbetet i qetë.
Një rikujtim i disa këshillave të Organizatës Botërore të Shëndetësisë:
Këshillat e OBSH-së për koronavirusin