Shkon në tre numri i të infektuarve me koronavirus në Kosovë
Ministri i Shëndetësisë i Kosovës, Arben Vitia, konfirmoi të shtunën se numri i të infektuarve me koronavirus në Kosovë ka arritur në tre.
Të premten u konfirmuan dy rastet e para me koronavirus në Kosovë.
“Sapo janë identifikuar rastet e para me koronavirusin, qeveria ka marrë masa të reja. Sot, në këtë konferencë, me keqardhje ju njoftoj për një rast të ri. Bëhet fjalë për një të afërm të pacientit nga Stublla e Vitisë që u konfirmua dje me Covid-19”, tha Vitia.
Dy pacientët e konfirmuar të premten, janë një 77 vjeç dhe një 20 vjeçe, ndërsa i treti është 39 vjeç.
Naser Ramadani, nga Instituti Kombëtar i Shëndetësisë Publike, tha se gjendja e tyre është stabile.
Hyn në fuqi ndalesa e udhëtimit nga Evropa në SHBA
Masa e presidentit të Shteteve të Bashkuara, Donald Trump, për ndalimin e udhëtimeve drejt SHBA-së nga 26 vende të Evropës, ka hyrë në fuqi.
Ndalesa është paraparë si masë për trajtimin e krizës së koronavirusit.
Ndalesa prek vendet e zonës pa kufij në Evropë, të njohur si Schengen.
Njerëzit që udhëtojnë nga Mbretëria e Bashkuar dhe Republika e Irlandës bëjnë përjashtim, ashtu si edhe të gjithë shtetasit amerikanë.
Në Shtetet e Bashkuara janë konfirmuar gati 2,000 raste me koronavirus, ndërsa 43 pacientë kanë vdekur.
Trump ka shpallur emergjencë kombëtare të shtunën.
Edhe një pacient në Kroaci shërohet nga koronavirusi
Pacienti i dytë i infektuar me koronavirus në Kroaci, është shëruar.
Drejtori i Institutit kroat të Shëndetit Publik, Krunosllav Çapak, tha se ai do të lirohet nga spitali gjatë ditës.
Kroacia njoftoi të enjten për shërimin e pacientit të parë nga koronavirusi, i cili ishte diagnostikuar më 26 shkurt.
Numri total i të infektuarve në këtë vend aktualisht është 37.
Nga e premtja pasdite deri të shtunën në mëngjes janë konfirmuar pesë raste të reja, tha Çapak.
Brenda një dite, mbi 1,500 raste të reja me koronavirus në Spanjë
Rastet me koronavirus në Spanjë janë rritur për më shumë se 1,500, thanë të shtunën zyrtarët shëndetësorë.
Sipas tyre, nga mbrëmja e së premtes, numri i rasteve të infektuara është rritur nga 4,231 në 5,753.
Deri të shtunën, autoritetet kanë raportuar për 136 të vdekur.
Spanja është vendi i goditur më së keqi në Evropë, pas Italisë, e cila ka mbi 15,000 raste të konfirmuara.
Të premten, Organizata Botërore e Shëndetësisë (OBSH) ka thënë se Evropa është tani “epiqendër” e pandemisë.
Drejtori i përgjithshëm i OBSH-së, Tedros Adhanom Ghebreyesus, u ka bërë thirrje vendeve që të aplikojnë masa agresive, mobilizim komunitetesh dhe distanca sociale për të shpëtuar jetë.