Shtyhen të gjitha garat e UEFA-s
Të gjitha garat e UEFA-s, përfshirë ndeshjet e Ligës së Kampionëve dhe të Ligës Evropiane, të parapara për javën e ardhshme, janë shtyrë, për shkak të shpërthimit të koronavirusit.
Në kuadër të Ligës së Kampionëve janë shtyrë ndeshjet: Manchester City - Real Madrid, Juventus - Lyon, Barcelona - Napoli dhe Bayern Munich - Chelsea.
UEFA, që është Federata Evropiane e Futbollit, tha se vendimet e mëtejshme për caktimin e ndeshjeve të shtyra "do të komunikohen në kohë të duhur".
UEFA po ashtu ka ftuar përfaqësuesit e 55 shoqatave anëtare të saj në një takim të martën, në mënyrë që të diskutojnë përgjigjet e mëtejshme ndaj koronavirusit.
Planifikimi i kampionatit Euro 2020 do të diskutohet në atë mbledhje.
Mbi një milion fëmijë preken nga mbyllja e shkollave në Austri
Në përgjigje të koronavirusit, Austria do të mbyllë shkollat nga e hëna deri më 4 prill, kur nis pushimi i Pashkëve.
Mbi një milion fëmijë do të preken nga kjo masë.
Mediat raportojnë se Qeveria austriake do që së paku 75 për qind e fëmijëve të qëndrojnë në shtëpi.
Disa shkolla, megjithatë, do të mbeten hapur, me staf minimal, për t’u kujdesur për fëmijët deri në 14 vjeç, prindërit e të cilëve punojnë dhe nuk mund të qëndrojnë në shtëpi.
Ministria e Arsimit tha se po përgatitet për leksione online.
Shkollat janë mbyllur në disa vende të Evropës, përfshirë: Italinë, Danimarkën, Republikën Çeke, Sllovakinë, Francën e Portugalinë.
Këtë javë, shkollat i ka mbyllur edhe Kosova.
BIK do t’i dezinfektojë xhamitë në Kosovë
Bashkësia Islame e Kosovës (BIK) do t’i dezinfektojë të gjitha xhamitë që janë të hapura për besimtarët në Kosovë, si masë për parandalimin e përhapjes së koronavirusit.
Këtë e ka bëtë të ditur kreu i Bashkësisë Islame të Kosovës, Naim Tërnava, pas takimit që ka zhvilluar me ministrin e Shëndetësisë, Arben Vitia.
Tërnava ka thënë se do të kërkohet ndihmë nga institucionet e tjera të Kosovës në procesin e dezinfektimit të xhamive, si dhe menaxhimit të situatës në rast të evidentimit të ndonjë rasti të infektuar me koronavirus.
Kreu i BIK-ut ka thënë se ky institucion do të zhvillojë një mbledhje të jashtëzakonshme ditën e shtunë, ku do të merren vendime sa i takon zhvillimit apo anulimit të aktiviteteve nëpër xhamitë e Kosovës.
Kosova dhe Mali i Zi janë aktualisht vendet e vetme në Ballkanin Perëndimor që nuk kanë raste të konfirmuara me koronavirus.
Izolimi në Itali bën punë
Italia është vendi më i goditur në Evropë nga koronavirusi.
Sipas shifrave të fundit nga Universiteti Johns Hopkins, ajo ka 15,113 njerëz të infektuar, 1,016 të vdekur dhe 1,045 të shëruar.
Autoritetet kanë izoluar gjithë vendin.
Dy javë pasi dhjetë qytetet e para janë izoluar dhe janë deklaruar “zona të kuqe”, ato nuk kanë të infektuar të rinj, tha ministri i Jashtëm i Italisë, Luigi Di Maio.
"Italia ishte vendi i parë në Evropë që u prek aq keq. Por, unë shpresoj se Italia do të jetë gjithashtu e para që do ta lërë pas emergjencën”, tha Di Maio.
~ Në këto fotografi mund të shihni pamje nga disa pjesë të Italisë këtë javë.
Italia në ditët e koronavirusit