Rusia do të zhvillojë paradë në përkujtim të Luftës së Dytë Botërore
Rusia do të zhvillojë një paradë ushtarake për të shënuar 75-vjetorin e Ditës së Fitores përgjatë Luftës së Dytë Botërore, pas shtyrjes së festimeve, si pasojë e përhapjes së koronavirusit, ka njoftuar presidenti rus, Vladimir Putin.
Putin është detyruar të anulojë paradën për shënimin e kësaj dite më 9 maj, pasi shtimit të numrit të personave të prekur me sëmundjen Covid-19, që shkakton koronavirusi.
Zakonisht, në Ditën e Fitores në Rusi shihen radhë të gjatë të ushtarëve, veteranëve, pajisje moderne ushtarake, dhe makina historike të Ushtrisë së Kuqe në Sheshin e Kuq të Moskës.
Në ditën kur do të duhej të organizohej parada, në Rusi janë zhvilluar ceremoni të vogla përkujtimore, mirëpo tani Putin i ka kërkuar Ministrit të Mbrojtjes, Sergei Shoigu, të nisë përgatitjet për festë muajin e ardhshëm.
“Ne do ta zhvillojmë atë më 24 qershor, në ditën kur është zhvilluar paradë legjendare e fituesve më 1945”, i ka thënë Putin ministrit rus të martën përmes një adresimi televiziv.
Përkujtimet e Ditës së Fitores janë të rëndësishme për kalendarin e vendeve të ish-Bashkimit Sovjetik, të cilat së bashku kanë humbur 26 milionë njerëz në Luftën e Dytë Botërore.
Spanja shpall dhjetë ditë zie për viktimat e koronavirusit
Qeveria e Spanjës shpalli dhjetë ditë të zisë, nisur nga e mërkura, për viktimat e pandemisë së koronavirusit.
Afro 27,000 njerëz kanë vdekur në Spanjë si pasojë e sëmundjes që e shkakton koronavirusi, COVID-19.
Gjatë periudhës së zisë, flamujt në ndërtesat publike do të ulen në gjysëm-shtizë, tha zëdhënësja e Qeversë spanjolle, Maria Jesus Montero.
Spanja ka humbur 26,834 njerëz nga koronavirusi.
Autoritetet atje kanë raportuar për mbi 235,000 njerëz të infektuar.
Nga 1 qershori, Maqedonia e Veriut pritet të hapë kufijtë me shtetet fqinje
Maqedonia e Veriut, nga data 1 qershor, pritet të hapë kufijtë me shtetet fqinje.
Kështu propozoi Komisioni për Sëmundje Infektive në mbledhjen e së martës, ku u propozua edhe heqja e orës policore, si dhe hapja e restoranteve dhe e kafeneve.
Këto kufizime janë ndërmarrë qysh në muajn mars, në përpjekje për të frenuar përhapjen e koronavirusit.
Propozimet e Komisionit për heqjen e tyre do të diskutohen në mbledhjen e Qeverisë së Maqedonisë së Veriut, të martën pasdite.
"Ne do të marrim vendime që do t'i lehtësojnë të gjitha këto masa kufizuese, por e gjithë kjo do të bëhet me respektimin e rreptë të masave nga qytetarët", tha kryeministri maqedonas, Oliver Spasovski.
Hapja e kufijve, sipas propozimit të Komisionit për Sëmundje Infektive, do të bëhet në koordinim me shtetet tjera të rajonit.
Ende nuk është e qartë nëse parashihen teste për koronavirus për qytetarët që hyjnë në Maqedoninë e Veriut, edhe pse ministri i Shëndetësisë, Venko Filipçe, ka thënë më herët se një gjë e tillë do të vështirësonte lëvizjen e qytetarëve.
Hapja e lokaleve të gastronomisë u tha se gjithashtu do të bëhet në përputhje me protokollet e Ministrisë së Shëndetësisë, ruajtjen e distancës fizike, apo përgjysmimin e kapaciteteve të objekteve.
Ndalesa për lëvizjen e qytetarëve deri tani ka qenë nga ora 19:00 deri në orën 05:00 të mëngjesit, ndërsa fundjavave është aplikuar edhe karantinë shtetërore, por me propozimin e ri ajo do të hiqet tërësisht.
Maqedonia e Veriut, të martën, ka regjistruar edhe tre të vdekur nga koronavirusi dhe 16 raste të reja të të infektuarve.
Me këto shifra, numri i viktimave në këtë vend shkon në 116, ndërsa i të infektuarve në 2,015.
