Fushata zgjedhore në Serbi në rrethana të pandemisë
Për shkak të epidemisë së koronavirusit dhe kufizimeve të kushtëzuara me masat për parandalimin e përhapjes së virusit, fushata zgjedhore e sivjetme në Serbi, në vend të mitingjeve dhe tubimeve tjera publike, aktivitetet i ka bartur në mediat elektronike, në portalet në internet, si dhe në rrjete sociale.
Serbia, menjëherë pas heqjes së gjendjes së jashtëzakonshme, më 6 maj, ka hyrë në fushatë zgjedhore, e cila do të zgjasë deri në fillimin e heshtjes zgjedhore në prag të zgjedhjeve lokale, krahinore dhe parlamentare të shpallura për 21 qershor.
Artikullin e plotë mund ta lexoni në këtë link.
Lufthansa do të rifillojë fluturimet në disa zona turistike
Duke filluar nga mesi i muajit qershor, kompania ajrore gjermane Lufthansa do të rifillojë fluturimet në 20 destinacione, duke përfshirë disa vendpushime të njohura, tha një zëdhënëse e kompanisë, raporton Reuters.
Destinacionet përfshijnë zonat turistike në Spanjë, Greqi, Itali dhe disa vende tjera, tha ajo, duke shtuar se të gjitha aeroplanët do të fluturojnë nga Frankfurti.
Gjatë javës së ardhshme do të njoftohet për destinacionet tjera.
Më parë, Lufthansa ka vendosur të rifillojë fluturimet për në Los Anxhelos, Toronto dhe Mumbai.
Kjo kompani, sikurse shumë kompani tjera ajrore, kanë qenë në bllokim pothuajse të plotë për shkak të pandemisë së koronavirusit.
Kompania njoftoi më 21 maj se po negocion me Qeverinë gjermane për një ndihmë financare.
Vuhani kryen edhe 1,1 milion teste për koronavirus
Qyteti kinez i Vuhanit – ku janë raportuar rastet e para me koronavirus –të shtunën ka kryer 1,146,156 teste për këtë virus, njoftuan autoritetet shëndetësore.
Kjo shifër e testeve është më e ulët krahasuar me testet që u kryen një ditë më parë, përkatësisht, më 22 maj në këtë qytet u testuan 1,470,950 persona.
Më herët gjatë këtij muaji, Vuhani ka nisur fushatën e testimit. Ky qytet planifikon të testojë të 11 milionë banorët e saj për koronavirus.
Testimet kanë për qëllim për të përcaktuar personat që janë të prekur nga sëmundja COVID-19, që shkaktohet nga koronavirusi, e të cilët nuk shfaqin simptoma.
Rastet e para me koronavirusin e ri në Vuhan u raportuan në dhjetorin e vitit 2019. Ky qytet aplikoi masa të rrepta për të parandaluar përhapjen e mëtejme të koronavirusit dhe në prill njoftoi se do të dalë nga izolimi.
