Paratë që s'preken dot
Republika e Kosovës ka pësuar humbje të mëdha financiare për shkak të pandemisë se shkaktuar nga koronavirusi. Për të mbuluar humbjet, Qeveria në detyrë e Kosovës është duke negociuar madje tashmë edhe ka aprovuar marrëveshje me disa institucione financiare ndërkombëtare për marrjen e kredive në mbi 300 milionë euro.
Derisa qeveria synon të hyjë në kredi ndërkombëtare, Trusti i Kursimeve Pensionale të Kosovës dhe Agjencia Kosovare e Privatizimit shumicën e parave i mbajnë të bllokuara ose të investuara në shtete të ndryshme të Evropës dhe botës.
Artikullin e plotë mund ta lexoni në këtë link.
Bien të ardhurat nga taksat në Gjermani
Të ardhurat nga taksat e qeverisë gjermane dhe të 16 shteteve federale, gjatë muajit prill, u ulën për rreth 39 miliardë euro apo 23.5%, për shkak të pandemisë së koronavirusit, thuhet në raportin mujor të ministrisë së Financave të Gjermanisë.
Ekonomia më e madhe e Evropës po përballet me recesionin e saj më të rëndë që nga Lufta e Dytë Botërore, pasi masat për parandalimin e sëmundjes kanë penguar aktivitetet publike dhe biznesin.
Të dhënat tregojnë se situata mbase do të jetë e vështirë edhe gjatë muajve të ardhshëm, tha ministria.
Rënia e të hyrave ishte më theksuar nga taksat e të ardhurave, korporatave dhe trafikut ajror.
Ndikimi i pandemisë në të ardhurat nga taksat ishte vërejtur në muajin mars, por tani është përshpejtuar.
Ministri i Financave në Gjermani, Olaf Scholz, tha në fillim të këtij muaji se kriza në të ardhurat tatimore nuk do ta ndalojë qeverinë të paraqesë një paketë stimuluese për të ndihmuar kompanitë të rimëkëmben nga kriza e koronavirusit.
Gjermania ka miratuar një paketë fillestare shpëtimi me vlerë më shumë se 750 miliardë euro, për të lehtësuar ndikimin e pandemisë në ekonomi.
Gjermania është zhytur në recesion pasi pësoi tkurrjen e saj më të madhe tremujore, që nga kriza financiare e vitit 2009.
Ekonomia u tkurr me 2.2% në tre muajt e parë të vitit 2020, pasi dyqanet dhe bizneset u mbyllën, në mes të marsit, për të luftuar përhapjen e koronavirusit.
OKB-ja i kërkon BE-së të marrë 160 migrantët e bllokuar në det
Kombet e Bashkuara kërkuan nga Bashkimi Evropian, që të arrijë një marrëveshje, për të marrë 160 migrantë të cilët janë bllokuar në Detin Mesdhe, tash e dy javë.
Agjencia e Kombeve të Bashkuara për Refugjatë (UNHCR) dhe Organizata Ndërkombëtare për Migrim (IOM) u bën thirrje Maltës dhe shteteve tjera evropiane, të shpejtojnë përpjekjet për të shpëtuar rreth 160 refugjatë dhe migrantë, të cilët janë në dy anije tregtare jashtë ujërave territoriale të Maltës.
Malta dhe Italia kanë mbyllur zyrtarisht portet e tyre për migrantët, gjatë pandemisë së koronavirusit të ri.
Vendimi është kritikuar nga grupet e të drejtave të njeriut.
Agjencitë thanë përmes një deklarate se migrantët, një numër i madh i të cilëve kanë ikur nga Libia e shkatërruar nga konflikti, duhet të lejohen të zbarkojnë në Maltë, dhe se vendet e tjera të BE-së duhet të tregojnë solidaritet, duke pranuar disa prej tyre.
Deklarata vuri në dukje se 160 migrantët kanë qendruar në anije për dy javë, "kohëzgjatje standarde që zbatohet për karantinën e COVID-19".
"Është e papranueshme të lihen njerëzit në det më gjatë se sa duhet, veçanërisht në kushte të vështira dhe të papërshtatshme", thotë deklarata.
Malta, e cila po përballet me një valë të mbërritjes së migrantëve, ka kërcënuar se do të bllokojë fondet për misionin detar të BE-së që ka për synim zbatimin e një embargoje armësh në Libi, nëse partnerët e saj evropianë nuk pranojnë disa prej migrantëve.
