Shefja e BE-së uron Trumpin dhe e fton të punojnë së bashku
Shefja e Bashkimit Evropian, Ursula von der Leyen, e ka uruar, gjithashtu, Trumpin “për fitore si presidenti i 47-të i Shteteve të Bashkuara”, dhe ka thënë se mezi pret të punojë me të për të avancuar një agjendë të fuqishme transatlantike.
“BE-ja dhe SHBA-ja janë më shumë sesa aleate. Ne jemi të lidhur nga partneriteti i vërtetë mes njerëzve tanë, duke lidhur 800 milionë qytetarë. Këto lidhje janë të thella, kanë rrënjë në historinë e përbashkët, në përkushtimin për liri dhe demokraci, dhe synimet e përbashkëta për siguri dhe mundësi për të gjithë”, ka thënë von der Leyen përmes një komunikate.
Ajo e ka ftuar Trumpin për të punuar së bashku në partneritet transatlantik.
“Miliona punë dhe miliarda në tregti dhe investime në dy anët e Atlantikut varen nga dinamika dhe stabiliteti i marrëdhënieve tona ekonomike”, ka thënë mes tjerash shefja e BE-së.
Trump i është afruar fitores, mirëpo ende nuk është shpallur zyrtarisht fitues i zgjedhjeve të 5 nëntorit.
Çfarë po ndodh?
Ju që sapo jeni zgjuar, apo sapo na jeni bashkuar, ja çfarë duhet të dini:
- Numërimi i votave në SHBA po zhvillohet me ritëm të shpejtë.
- Kandidati i republikanëve për president, Donald Trump, ka siguruar 267 vota të Kolegjit Zgjedhor, pasi ka siguruar fitoren në tri shtete kyçe të papërcaktuara: Pensilvani, Karolinën e Veriut dhe Xhorxhia.
- Në katër shtetet e tjera të papërcaktuara - Uiskonsin, Nevadë, Miçigan dhe Arizonë - rezultati nuk është shpallur ende, por në shumë prej tyre prin Trump.
- Për t’u shpallur president, një kandidati i duhen të paktën 270 vota elektorale. Pra, Trump është afruar shumë.
- Kandidatja e demokratëve për presidente, Kamala Harris, ka siguruar 224 vota të Kolegjit.
- Vetë Trump e ka shpallur veten fitues, dhe u është drejtuar mbështetësve të tij nga Florida. Ai është zotuar se do ta shërojë SHBA-në.
- Liderë prej gjithë botës, përfshirë shefen e BE-së, shefin e NATO-s, presidentin e Ukrainës, dhe të vendeve tjera, e kanë uruar Trumpin për fitore.
- Megjithatë, fitorja e tij ende nuk është shpallur zyrtarisht.
Liderët e Britanisë, Gjermanisë, Francës dhe Italisë urojnë Trumpin
Liderët e vendeve kyçe evropiane i janë bashkuar radhës që urojnë Trumpin, për fitoren që ende nuk është shpallur zyrtarisht.
Kryeministri britanik, Keir Starmer, e ka uruar Trumpin për atë që e ka cilësuar “fitore historike”.
“Si ndër aleatët më të ngushtë, ne qëndrojmë krahë për krahë me njëri-tjetrin për t’i mbrojtur vlerat tonë të përbashkëta, lirinë dhe demokracinë. E di që lidhja speciale SHBA-Britani do të sjellë prosperitet në të dyja anët e Atlantikut, në vjetët në vijim”.
Kancelari gjerman, Olaf Scholz, e ka uruar Trumpin dhe ka thënë se “Gjermania dhe SHBA-ja kanë punuar me sukses për kohë të gjatë, për të promovuar lirinë në të dyja anët e Atlantikut”.
“Ne do të vazhdojmë të veprojmë ashtu në të mirë të qytetarëve tanë”.
Presidenti francez, Emmanuel Macron, ka thënë se është i gatshëm të punojë me Trumpin sikurse në mandatin e kaluar.
“Me bindjet tuaja dhe të miat. Me respekt dhe ambicie. Për më shumë paqe dhe prosperitet”, ka thënë Macron përmes një postimi në X – platformën e njohur më parë si Twitter.
Kryeministrja e Italisë, Giorgia Meloni, e ka uruar, po ashtu, Trumpin, dhe ka thënë se Evropa është gati.
“Italia dhe Shtetet e Bashkuara janë kombe ‘simotra’, të lidhura nga një aleancë e patundur, vlera të përbashkëta dhe miqësi historike”.
Pas Osmanit, Trumpin e urojnë edhe krerë opozitarë
Presidentja e Kosovës, Vjosa Osmani, e ka uruar e para Trumpin nga Kosova.
Të shpejtë kanë qenë edhe krerë të partive opozitare.
Vetë Trump e ka shpallur fitoren, por diçka e tillë nuk është zyrtarisht ende, pasi numërimi i votave po vazhdon.
Kandidati i Partisë Demokratike për kryeministër, Bedri Hamza, e ka uruar Trumpin dhe i ka lavdëruar republikanët dhe demokratët për garën e zhvilluar.
"Zgjedhjet në Amerikë janë festë e mrekullueshme e demokracisë. I shpreh urimet më të përzemërta presidentit Donald Trump për fitoren e tij", ka thënë Hamza në llogarinë e tij në Facebook.
Kryetari i Lidhjes Demokratike të Kosovës, Lumir Abdixhiku, e ka uruar Trumpin dhe ka thënë se shpreson që Kosova do ta ketë vëmendjen e administratës së ardhshme në SHBA.
"Rikthimi i Kosovës në agjendën e Washingtonit është interes nacional i popullit të Kosovës. Pa SHBA-në, ecja e Kosovës si shtet i ri në konsolidim ndërkombëtar është e pamundur! Në Qeverinë e ardhshme, këto lidhje do të rikuperohen e mirëmbahen si orientime të pandryshueshme, të pathyeshme, të pazëvendësueshme!", ka thënë Abdixhiku në Facebook.
Urimeve u është bashkuar edhe udhëheqësi i Aleancës për Ardhmërinë e Kosovës (AAK), Ramush Haradinaj, i cili shpreson se fitorja e pretenduar e Trumpit do të ndihmojë për anëtarësimin e Kosovës në NATO.
"Nën udhëheqjen e presidentit Trump kemi krijuar ushtrinë e Kosovës. Jam i bindur se, nën drejtimin e tij, Shtetet e Bashkuara të Amerikës do të vazhdojnë të qëndrojnë si aleati ynë më i fortë dhe i palëkundur", ka thënë Haradinaj në Facebook.
Kosova ka gëzuar përkrahjen e SHBA-së, ndër vite, pavarësisht kush ka qenë në krye të saj.
Administrata aktuale ka inkurajuar vazhdimisht Kosovën që t’i normalizojë marrëdhëniet me Serbinë si një kusht për të ecur përpara në rrugën e integrimit evropian, ndërsa Trumpi, sa ishte president, ishte dëshmitar i nënshkrimit të një marrëveshjeje midis Kosovës dhe Serbisë për normalizimin e marrëdhënieve ekonomike.
Administrata e mëparshme e Trumpit ka thënë se nuk do ta kundërshtonte shkëmbimin e territoreve mes Kosovës dhe Serbisë për ta zgjidhur mosmarrëveshjen mes tyre, me kusht që Prishtina dhe Beogradi do të përpunonin një “zgjidhje të kënaqshme reciproke”. Qeveria aktuale e Kosovës e ka kundërshtuar një ide të tillë.
Qeveria e Kosovës nuk është deklaruar ende lidhur me fitoren e pretenduar të Trumpit.
