Të dashur lexues,
Mbulimin direkt të zgjedhjeve në SHBA prej tash e merr Krenare Cubolli.
Faleminderit që na ndiqni!
Ditë të mbarë nga unë Valona Tela.
Mirëmëngjesi të gjithëve nga unë, Krenarja!
Do të jemi së bashku përgjatë ditës 😊
Jemi në pritje të deklarimit të paralajmëruar të kandidatit të republikanëve, Trump.
Kandidatja e demokratëve, Harris, nuk do të deklarohet tani për tani.
Faleminderit që jeni me ne!
Trump fiton edhe në Pensilvani
Kandidati i republikanëve, Trump, ka fituar edhe në Pensilvani, një tjetër shtet i papërcaktuar, raporton AP dhe agjenci tjera amerikane.
Ai veçse ka fituar në Karolinë të Veriut dhe në Xhorxhia, edhe ato shtete të papërcaktuara.
Kështu, Trump ka siguruar edhe 19 vota elektorale shtesë, duke iu afruar edhe më tepër fitores.
Trump: Do t’i ndihmojmë shtetit të shërohet
Republikani Trump po u drejtohet mbështetësve të tij nga Florida.
Afër tij janë familjarët dhe pjesëtarë të ekipit politik, përfshirë të nominuarin për nënpresident, J.D.Vance.
Ai ka thënë para mbështetësve se kjo ka qenë lëvizja më e madhe politike në historinë amerikane.
“Do t’i ndihmojmë shtetit tonë të shërohet”, ka thënë Trump.
Deri më tani, Trump ka fituar 267 vota elektorale, ndërsa Harris 224.
Për të fituar, një kandidat duhet të sigurojë të paktën 270 vota.
“Amerika na ka dhënë një mandat të pashembullt dhe të fuqishëm”, ka thënë Trump, si referencë për fitoren e republikanëve në Senat, i cili deri më tani është kontrolluar nga Partia Demokratike.
