Orban komenton zgjedhjet në SHBA
“Rrugës drejt një fitoreje të bukur” - kështu tha kryeministri i Hungarisë, Viktor Orban, teksa komentoi zgjedhjet në SHBA në një postim në Facebook.
Orban ka mbështetur hapur garën e Trumpit për president të SHBA-së.
Mirëmëngjesi të gjithë juve që sapo na jeni bashkuar!
Ja lajmet kryesore për ju:
- Kandidati republikan, Donald Trump, ka fituar në dy shtete vendimtare: Karolinë të Veriut dhe Xhorxhia.
- Në pesë shtetet e tjera të papërcaktuara - Pensilvani, Uiskonsin, Nevadë, Miçigan dhe Arizonë - rezultati nuk është shpallur ende, por në shumë prej tyre prin Trump.
- Rezultatet në shtetet e tjera kanë qenë kryesisht të pritshme - republikanët i kanë ruajtur bastionet e tyre, demokratët të vetat.
- Parashikimet janë që republikanët do ta marrin edhe kontrollin e Senatit amerikan.
Trump fiton edhe në një shtet kyç
Kandidati republikan, Donald Trump, fitoi në Xhorxhia, raportojnë AP, Reuters dhe CNN.
Xhorxhia njihet si shtet i papërcaktuar, ku secili kandidat mund të fitojë.
Të tilla janë edhe gjashtë: Pensilvania, Uiskonsini, Karolina e Veriut, Nevada, Miçigani dhe Arizona.
Më herët, Trump u shpall fitues edhe në Karolinë të Veriut.
Me fitoren në Xhorxhia, ai siguroi edhe 16 vota nga Kolegji Zgjedhor.
Në zgjedhjet e vitit 2020, në këtë shtet fitoi kandidati demokrat.
Harris nuk do të flasë sot
Fushata e kandidates demokrate, Kamala Harris, bëri të ditur se nuk do të deklarohet sot, por nesër - me kohën e SHBA-së - në lidhje me rezultatin e zgjedhjeve.
Mediat amerikane raportojnë se disponimi në mesin e mbështetësve të saj ka rënë, pasi rezultatet e para e nxjerrin në epërsi kandidatin republikan, Donald Trump.
Mbështetësit e këtij të fundit janë parë duke festuar në Uest Pallm Biç të Floridës, ku raportohet se do t’iu bashkohet edhe Trumpi.
