Kuvendi në pauzë deri në orën 16:30
Zyra për media në Kuvendin e Kosovës, ka bërë të ditur se me kërkesën e iniciuesit të seancës se sotme të jashtëzakonshme, Kuvendit shkon në pauzë deri në orën 16:30.
Kjo seancë është thirrur me kërkesën e Qeverisë së Kosovës për të votuar për ekipin negociator në dialog me Serbinë.
Kuvendi është në pauzë që prej orës 11:00.
(Video: Kryeministri Haradinaj prezanton ekipin negociator të emëruar nga Qeveria)
Pacolli pret emërimin e ekipit negociator
Zëvendëskryeministri, njëherësh ministri i Jashtëm i Kosovës Behgjet Pacolli, vonesën e vazhdimit të seancës e ka arsyetuar me faktin që sipas tij, grupet parlamentare kanë ende nevojë për mendime e konsultime.
Megjithatë, ai ka shprehur besimin se grupi negociator i propozuar nga kryeministri, Ramush Haradinaj, ku bën pjesë edhe vet Pacolli, do ta ketë përkrahjen e Kuvendi dhe do të marr numrin e mjaftueshëm të votave.
"Grupi për dialog që është propozuar nga Qeveria do të kalojë sot në Kuvend dhe do të ketë legjitimitet të plotë që të shkojë në Bruksel dhe të dialogojë me serbët", tha Pacolli.
Pacolli tha se grupi i cili do të bisedoi me serbët, nuk ka kompetenca që të flasë në Bruksel për ndryshim e kufirit me Kosovës dhe Serbisë.
"Ndryshimi i kufijve nuk nënkupton ndarjen e territoreve te Kosovës, por ndoshta ka për synimi demarkacioni", tha Pacolli.
LDK: AAK dhe Nisma dorëzohen përballë Thaçit
“Seanca e thirrur nga Qeveria është dorëzim i AAK-së dhe Nismës përballë presionit të PDK-së dhe Thaçit për prishje të koalicionit dhe shantazheve të ditëve të fundit”.
Kështu thuhet në një komunikatë për media nga Grupi Parlamentar i Lidhjes Demokratike e Kosovës.
Aty thuhet se "këto dy parti tash do të luajnë lojën e z.Thaçi duke nëpërkëmbur shtetin e Kosovës. Ekipi negociator, që nuk përfaqëson vullnetin e shumicës së qytetarëve shumicë të Kosovës, do të përligj në emër të Qeverisë marrëveshjet e fshehta të z.Thaçi me Serbinë".
LDK po ashtu thotë se shteti i Kosovës po hynë në një fazë kritike të ekzistencës së vet, për shkak të veprimeve të kastës udhëheqëse, siç vlerëson kjo parti, “vrastare për perspektivën e shtetit të Kosovës”.
"Për LDK-në, sovraniteti dhe integriteti i Kosovës është panegociueshëm. LDK-ja nuk do të lejojë përdhosje të shtetit të Kosovës. LDK-ja do t’ju prij ndryshimeve që duhet të ndodhin së shpejti në Kosovë. LDK-ja nuk do të dorëzohet ndaj dhunës që po i bëhet shtetësisë së Kosovës", përfundon komunikata e LDK-së.
Konjufca: Haradinaj frikësohet nga PDK-ja se mund ta rrëzojë nga pushteti
Shefi i Grupit Parlamentar të Lëvizjes Vetëvendosje, Glauk Konjufca tha se ekipi negociator, i propozuar nga Qeveria e Kosovës, është një projekt i presidentit Hashim Thaçi.
Konjufca tha se kësaj ideje kryeministri Ramush Haradinaj dhe zëvendësi i tij, Fatmir Limaj, i rezistuan për dy muaj, por sipas tij, në seancën e sotme të jashtëzakonshme, “ata u dorëzuan”.
“Fillimisht, Ramush Haradinaj dhe Fatmir Limaj rezistuan për dy muaj deri në ditën e sotme. Sot unë do ta quaja dita e dorëzimit të Ramush Haradinajt dhe Fatmir Limajt, pra të AAK-së dhe Nismës karshi PDK-së dhe projektit të saj që përreth presidentit Thaçi të grumbullojnë një grup të negociatorëve të cilët shkojnë në Bruksel. Kjo u arrit në këtë seancë dhe kjo tregon vetëm një gjë, kjo tregon që Ramush Haradinaj nuk mund të dalë nga grushti i Thaçit e as nga xhepi i Kadri Veselit dhe çka do që ta komandojnë ata, ky nuk ka qare pa iu shkruar mbrapa, për arsye se është i udhëhequr nga principi i lakmisë për pushtet”, tha Konjufca.
“Lakmia e madhe për pushte dhe kërcënimi i PDK-së që atë mund ta rrëzojn kur të duan, e detyron Ramush Haradinajn të dorëzohet në ditën e sotme, t'i gëlltis të gjitha ato deklarata që nuk është për ndryshim të territoreve, që nuk e përkrahë presidentin Thaçi”, tha Konjufca.
Lexo edhe këtë: Vetëvendosje: Do ta rrëzojmë nga pushteti Hashim Thaçin
Facebook Forum