Gjini shpall fitoren në Gjakovë
Kandidati për kryetar të Komunës së Gjakovës, Ardian Gjini ka shpallur fitoren në këtë komunë.
“Në Gjakovë të gjitha projeksionet na nxjerrin fitues. është lajm i mirë. Është fitore për Gjakovën. Për pak kohë do të dalin edhe rezultate preliminare, që do të konfirmojnë këtë”, tha Gjini.
Gjini, që vjen nga radhët e Aleancës për Ardhmërinë e Kosovës, kundërkandidate në rundin e balotazhit e kishte Mimoza Kusari-Lila nga Lëvizja Vetëvendosje.
Në rundin e parë të zgjedhjeve që u mbajt më 17 tetor, Gjini fitoi 45.76 për qind të votave dhe Kusari-Lila së 37.20 për qind.
DnV: Proces i qetë dhe pa incidente serioze
Koalicioni i organizatave joqeveritare, Demokracia në Veprim tha se rundi i dytë i zgjedhjeve lokale, që u mbajt më 14 nëntor në 21 komuna të Kosovës, ka qenë i qetë, por me një pjesëmarrje më të ulët në votime krahasuar me rundin e parë.
“Dita e zgjedhjeve nuk është karakterizuar nga ndonjë incident serioz brenda vendvotimeve, që do të mund ta cenonte integritetin apo kredibilitetin e procesit. Gjatë tërë ditës së votimit, është regjistruar një trend përgjithësisht linear i pjesëmarrjes në votime, pa ndonjë fluks të theksuar të votueseve në qendra të votimit”, thuhet në njoftimin e DnV-së.
Sipas të dhënave të Komisionit Qendror të Zgjedhjeve dalja në zgjedhje ishte rreth 38 për qind.
DnV-ja po ashtu tha se gjatë votimeve ka pasur shkelje të masave kundër pandemisë së koronavirusit, si nga votuesit ashtu edhe nga stafi zgjedhor.
Përfundon procesi i votimit
Qytetarët në 21 komuna të Kosovës votuan të dielën për të zgjedhur kryetarët e rinj.
Dalja në rundin e balotazhit ishte rreth 38 për qind.
Garat u zhvilluan në Prishtinë, Gjakovë, Gllogoc, Gjilan, Dragash, Istog, Kaçanik, Klinë, Fushë Kosovë, Kamenicë, Obiliq, Rahovec, Podujevë, Prizren, Shtime, Viti, Vushtrri, Malishevë, Junik, Mamushë dhe në Kllokot.
Vendvotimet u hapën në ora 07:00 dhe u mbyllën në ora 19:00.
Të drejtë vote në këto zgjedhje kishin 1,260,571 qytetarë.
Votuesit e rinj kërkojnë arsim më cilësor
Sinan Korllak, një 18-vjeçar nga Prizreni, për herë të parë ka votuar në rundin e dytë të zgjedhjeve për kryetar të komunës. Sinani thotë se rinia në këtë qytet nuk gëzon përkrahje, derisa kërkon nga kryetari i ri i komunës ngritje të nivelit të arsimit, si dhe fuqizim të rolit të rinisë.
