Kryeministri i Kosovës bisedon me kryetarin e BDI-së
Kryeministri i Kosovës, Albin Kurti, takoi në Ohër Ali Ahmetin, kryetar i partisë shqiptare në Maqedoni të Veriut, Bashkimi Demokratik për Integrim. Dy zyrtarët biseduan në prag të takimit të Kurtit me presidentin e Serbisë, Aleksandar Vuçiq. Asnjëri prej tyre nuk u deklarua për media.
Çfarë thotë propozimi i BE-së?
Bashkimi Evropian ka publikuar më 27 shkurt tekstin e plotë të propozimit të tij për normalizimin e marrëdhënieve mes Kosovës dhe Serbisë.
Teksti është publikuar pas një takimi të kryeministrit të Kosovës, Albin Kurti, dhe presidentit të Serbisë, Aleksandar Vuçiq, në Bruksel.
Teksti i propozimit përmban 11 nene. Se çfarë thonë ato, mund të lexoni këtu.
Rezultati pozitiv arrihet me “vullnet politik, kurajë dhe pragmatizëm”
Ambasadori i Mbretërisë së Bashkuar në Kosovë, Nicholas Abbott, tha se bisedimet në Ohër për normalizimin e marrëdhënieve Kosovë-Serbi mund të prodhojnë “rezultat pozitiv” nëse palët tregojnë “vullnet politik, kurajë dhe pragmatizëm”.
“Nga kjo do të përfitonin të gjithë qytetarët dhe komunitetet. Mbretëria e Bashkuar mbështet ndërmjetësuesit e BE-së dhe është e gatshme të ndihmojë”, shkroi Abbott në Twitter.
Vendi i tij e ka mbështetur propozimin e BE-së për normalizimin e marrëdhënieve Kosovë-Serbi.