Borrell: Sytë e BE-së dhe të Ballkanit Perëndimor janë në Ohër
Shefi i politikës së jashtme të Bashkimit Evropian, Josep Borrell, tha se sytë e BE-së dhe të Ballkanit Perëndimor janë sot në Ohër.
Në këtë qytet të Maqedonisë së Veriut mbahet sot një takim mes kryeministrit të Kosovës, Albin Kurti, dhe presidentit të Serbisë, Aleksandar Vuçiq.
Borrell dhe i dërguari i BE-së për dialogun Kosovë-Serbi, Mirosllav Lajçak, janë ndërmjetësues të takimit.
Borrell shkroi në Twitter se në agjendë të bisedimeve është aneksi i zbatimit të propozimit evropian për normalizimin e marrëdhënieve Kosovë-Serbi.
Nisin takimet dypalëshe
Presidenti i Serbisë, Aleksandar Vuçiq, po zhvillon një takim me ndërmjetësuesit evropianë të bisedimeve për normalizimin e marrëdhënieve midis Prishtinës dhe Beogradit.
Pas tij, shefin e politikës së jashtme të BE-së, Josep Borrell, dhe të dërguarin e BE-së për dialogun Kosovë-Serbi, Mirosllav Lajçak, do t’i takojë kryeministri i Kosovës, Albin Kurti.
Sipas agjendës paraprake, në fund do të pasojë takimi i përbashkët.
Vazhdoni të përcillni Radion Evropa e Lirë për informacione në kohë reale.
Stoltenberg pret përparim në takimin në Ohër
Sekretari i përgjithshëm i NATO-s, Jens Stoletenberg, tha se bisedimet në Ohër janë të rëndësishme dhe se pret nga kryeministri i Kosovës, Albin Kurti, dhe presidenti i Serbisë, Aleksandar Vuçiq, që të angazhohen në mënyrë konstriktive dhe të bëjnë përparim.
“Ky është çelësi për stabilitet të qëndrueshëm dhe të ardhme evropiane dhe euro-atlantike të rajonit”, shkroi Stoltenberg në Twitter.
Ai shtoi se misioni i NATO-s në Kosovë, KFOR, do të vazhdojë të punojë për një Kosovë të qëndrueshme dhe paqësore.
Kovaçevski: Maqedonia e Veriut mbështet dialogun Kosovë-Serbi
Kryeministri i Maqedonisë së Veriut, Dimitar Kovaçevski, tha se mbështet dialogun Kosovë-Serbi për normalizimin e marrëdhënieve, duke shtuar se ai është zgjidhje e duhur për konsolidimin e paqes në rajon.
Vendi i tij është sot nikoqir i një takimi midis kryeministrit të Kosovës, Albin Kurti, dhe presidentit të Serbisë, Aleksandar Vuçiq.
“Do të doja të nënvizoj se Republika e Maqedonisë së Veriut nuk është zgjedhur rastësisht. Shteti jonë, i mbështetur nga BE-ja, ka bërë një hap historik. Ne jemi bërë anëtar i NATO-s. Besojmë se dialogu është e vetmja mënyrë për të arritur progres. Vendi i shteteve të Ballkanit Perëndimor është në Bashkimin Evropian”, tha Kovaçevski në një konferencë për media në Ohër.
