Arrestohen dy persona, dyshohet se tentuan të blejnë vota
Policia e Kosovës ka arrestuar dy persona në Komunën e Malishevës si të dyshuar për veprën penale “Dhënia ose marrja e ryshfetit në lidhje me votimin”.
Në një njoftimin e Prokurorisë Speciale të Republikës së Kosovës, thuhet se të arrestuarit janë një vëzhgues dhe një komisioner nga qendra e vendvotimit në gjimnazin “Hamdi Berisha” nën dyshimet për shitblerje të votës.
Me urdhër të Prokurorit të Shtetit, të njëjtit janë në ndalim.
“Prokurori i Shtetit dhe Policia e Kosovës mbeten të përkushtuar në realizimin e detyrave dhe përgjegjësive të tyre ligjore, në mënyrë profesionale, transparente dhe të paanshme karshi qytetarëve dhe vendit, andaj inkurajojmë të gjithë qytetarët që të bashkëpunojnë me Prokurorinë e Shtetit dhe Policinë e Kosovës dhe njëherësh të raportojnë për ç’do rast të kundërligjshëm që ndërlidhet me sigurinë dhe procesin zgjedhor”, thuhet në njoftim.
PZAP pranon 21 ankesa
Paneli Zgjedhor për Ankesa dhe Parashtresa (PZAP) në Kosovë njoftoi se deri rreth orës 18:30, ka pranuar 21 ankesa lidhur me zgjedhjet lokale.
Mulë Desku, kryesues i Sekretariatit të PZAP-it, tha për Radion Evropa e Lirë se ankesat kryesisht kanë të bëjnë me pretendimin se është thyer heshtja zgjedhore.
“Tash për tash nuk kemi ankesa nga individë, vetëm nga subjektet politike dhe shoqëria civile”, tha Desku.
Ai po ashtu bëri të ditur se gjatë të shtunës janë pranuar katër ankesa lidhur me pretendimin për thyerjen e heshtjes zgjedhore.
Nis mbyllja e vendvotimeve për zgjedhjet lokale
Në ora 19:00 ka nisur mbyllja e vendvotimeve në Kosovë. Qytetarët në zgjedhjet lokale votuan për të zgjedhur kryetarët e rinj dhe përbërjet e reja të asambleve komunale për 38 komunat e Kosovës.
Këto ishin zgjedhje të rregullta lokale dhe të drejtë vote kishin 1 milion e 885 mijë e 448 votues.
Komisioni Qendror i Zgjedhjeve më herët tha për Radion Evropa e Lirë se rezultatet preliminare pritet të publikohen sonte.
DnV: Nuk ka pasur incidente serioze gjatë zgjedhjeve
Koalicioni i organizatave joqeveritare, Demokracia në Veprim, pas nisjes së mbylljes së vendvotimeve tha se në zgjedhjet lokale nuk ka pasur incidente serioze, që do të mund të komprometonin integritetin apo kredibilitetit zgjedhor.
Eugen Cakolli nga DnV në një konferencë për media, tha se në zonat rurale ka pasur më shumë shkelje, qoftë të masave kundër koronavirusit, por edhe kanë parë persona që kanë qëndruar pranë qendrave të votimit.
“Në pjesën veriore të vendit, procesi i votimit ka rrjedhur i qetë dhe nuk ka pasur ndonjë incident që do të mund ta cenonte integritetin e procesit zgjedhor”, tha Cakolli.
“Karakteristikë e komunave veriore, e në veçanti e Mitrovicës së Veriut është dalja e jashtëzakonshme e qytetarëve në zgjedhje, e cila është të paktën dy fish më e lartë se mesatarja e vendit gjatë pjesës së ditës”, shtoi ai.
Ai po ashtu theksoi se nuk kanë shënuar asnjë rast të ndërprerjes së procesit të votimit, qoftë për shkak të energjisë elektrike apo për ndonjë problem tjetër. Cakolli po ashtu bëri me dije se kanë evidentuar raste kur qytetarët janë lejuar që të votojnë me dokument me afat të skaduar.
Facebook Forum