Zyrtarët serbë nisen drejt vendvotimeve - pa maska
Zyrtarë nga Mitrovica e Veriut nuk kanë respektuar të dielën masat në fuqi për luftim të pandemisë së koronavirusit në Kosovë.
Rrugës për në vendvotime, zyrtarë të Listës Serbe, por edhe nënkryetarja e Mitrovicës së Veriut, Adrijana Hoxhiq dhe bashkëpunëtorët e saj, janë parë pa maska.
Mbajtja e maskave, përfshirë në vendet e hapura, është ende në fuqi në Kosovë.
Kjo masë vlen edhe për personat që ecin vetëm në rrugë.
Kur është pyetur nga Radio Evropa e Lirë se pse Hoxhiq, bashkë me disa persona tjerë janë parë në rrugë pa maska, ajo ka thënë se shumica prej tyre kanë qenë të vaksinuar.
“Në vendvotime besoj se të gjithë kemi pasur maska. Fakt është që një pjesë e mirë e qytetarëve nuk mbanin maska mbrojtëse në vende të hapura, por është gjithashtu është fakt se shumica e këtyre njerëzve në fakt ishin të vaksinuar”, ka thënë ajo.
Në orët e hershme të mëngjesit të së dielës, në grup janë parë edhe anëtarë të Listës Serbe.
Disa prej tyre po ashtu nuk kanë pasur maska dhe as nuk kanë respektuar distancën fizike.
Ky subjekt politik nuk është përgjigjur në kërkesën e Radios Evropa e Lirë për të komentuar në këtë çështje.
KQZ: Deri në orën 15:00 votuan 27 për qind e qytetarëve të Kosovës
Deri në ora 15:00, sipas të dhënave të Komisionit Qendror të Zgjedhjeve, të drejtën e votimit e kanë ushtruar 27 për qind e qytetarëve të Kosovës.
Sipas kësaj shifre, i bie që mbi 500 mijë qytetarë kanë votuar në zgjedhjet lokale.
Dalja në zgjedhje është më e ulët krahasuar me zgjedhjet e vitit 2017, kur deri në orën 15:00 kishin votuar 29 për qind e votuesve.
Të dielën, qytetarët e Kosovës po votojnë për të zgjedhur kryetarët dhe asambletë komunale në 38 komuna.
Ndalohet një person për pengim të procesit të votimit
Prokurori i Shtetit tha se në Komunën e Suharekës është ndaluar një person, që dyshohet se ka kryer veprën penale “Pengim i procesit të njoftimit”.
Sipas njoftimit, i dyshuari ka penguar procesin e votimit duke prishur rendin dhe qetësinë dhe më pas ka thyer edhe dritën fluoreshente.
Dalje e lartë në zgjedhje në komunat me shumicë serbe
Komunat e banuara me shumicë serbe kanë daljen më të lartë në zgjedhjet lokale të Kosovës, që po mbahen këtë të diel.
Sipas të dhënave të Komisionit Qendror të Zgjedhjeve, deri në orën 15:00, Komuna e Zveçanit ka daljen më të lartë, përkatësisht 56.91 për qind e qytetarëve kanë votuar.
Pas Zveçanit vije Mitrovica e Veriut me 55.03, pasuar nga Leposaviqi me 47.97 për qind të daljes së qytetarëve.
Më pas vije, Komuna e Novobërdës me 46.58 për qind, Zubin Potoku me 44.53 për qind Shtërpca me 42.43 për qind, Ranillugu 40.68, Klokot me 37.50 për qind.
Në fund, radhiten Parteshi me 36.30 për qind dhe Graçanica me 32.47 për qind.
Facebook Forum