Ukraina pretendon se 4,300 rusë kanë vdekur
Zëvendësministrja e Mbrojtjes në Ukrainë, Hanna Malyar, ka diskutuar të dielën për humbjet që ka thënë se i janë shkaktuar Rusisë deri më tani.
Në një postim në Facebook, ajo ka thënë se shifrat e tri ditëve të para janë preliminare dhe mund të ndryshojnë.
Sipas saj, 4,300 rusë kanë humbur jetën dhe një mori pajisjesh janë shkatërruar.
Gjermania zotohet për rritje të shpenzimeve ushtarake
Kancelari gjerman, Olaf Scholz ka njoftuar se do të rrisë shpenzimet për mbrojtje.
Duke folur në një takim urgjent në Parlamentin gjerman, ai ka thënë se 100 miliardë euro do të shtohen në buxhetin ushtarak për këtë vit.
Kjo nënkupton se Gjermania do të shpenzojë më shumë se 2 për qind të bruto prodhimit të brendshëm në mbrojtje.
Ky është një tjetër ndryshim në vendime rreth mbrojtjes në Gjermani, duke përfshirë një vendim të marrë më 26 shkurt, për të nisur dërgimin e armëve drejtpërdrejt në Ukrainë.
Kancelari Scholz ka thënë se bota ka hyrë “në një epokë të re”, pas pushtimit rus në Ukrainë dhe se “nuk mund të ketë përgjigje tjetër ndaj agresionit të Putinit”.
Bota proteston kundër luftës
Mijëra persona kanë dalë nëpër rrugët e qyteteve të ndryshme në botë për të mbështetur Ukrainën, e cila ka hyrë në ditën e katërt të luftës së shkaktuar nga sulmet e Rusisë.
"Jo luftës"
Guvernatori i Harkivit: Ukrainasit kanë kthyer kontrollin e qytetit
Raportohet se forcat ukrainase kanë rikthyer kontrollin e qytetit të dytë më të madh të Ukrainë, Harkiv.
Në një postim në Telegram, Oleh Synyehubov ka thënë se kontrolli i Harkivit “është i gjithi i yni”.
“Forcat e armatosura, policia, forcat e mbrojtjes janë duke punuar dhe qyteti është duke u pastruar plotësisht nga armiku”
Trupat ruse kanë arritur të hyjnë në këtë qytet natën e kaluar.
Në disa pamje që kanë qarkulluar në rrjetet sociale janë parë përleshje në mes të trupave ukrainase dhe atyre ruse.