Pse Ukraina nuk është anëtare e NATO-s?
Shumë e shohin çështjen e anëtarësimit të Ukrainës në NATO si thelbësore për tensionet dhe krizën që kulmoi me nisjen e pushtimit të Ukrainës nga Rusia natën e 24 shkurtit.
Megjithatë, ka shpjegime të tjera se pse Rusia pushtoi Ukrainën.
Artikullin e plotë mund ta lexoni KËTU
Ministri ukrainas: Banorëve të Kievit u janë shpërndarë 25,000 armë automatike
Teksa forcat ruse po avancojnë drejt qendrës së Kievit, autoritetet ukrainase thanë se u kanë shpërndarë qytetarëve mijëra armë.
Një total prej 25,000 armëve automatike si dhe 10 milionë fishekë janë shpërndarë, tha ministri i Brendshëm i Ukrainës, Denys Monastyrsky, përmes një videoje të publikuar të shtunën.
Ai po ashtu shtoi se edhe armë anti-tank janë shpërndarë.
“Kievi do ta mbrojë veten”, tha ai.
Monastyrsky tha se qytetarët po angazhohen vet që të mbrojnë shtëpitë e tyre.
Kadyrov: Luftëtarët çeçenë u janë bashkuar Rusisë në pushtimin e Ukrainës
Lideri i rajonit rus të Çeçenisë tha se ka dislokuar luftëtarët e tij në Ukrainë për t’iu bashkuar trupave ruse në betejë.
Në një video të postuar online, Ramzan Kadyrov, pretendoi se forcat çeçene deri më tani kanë arritur të marrin nën kontroll objekte të ushtrisë ukrainase, pa pësuar viktima.
Lideri i republikës jugore ruse është aleat kyç i presidentit, Vladimir Putin.
Duke justifikuar pushtimin, ai tha se vendimi i Putinit për të sulmuar Ukrainën do të mbrojë Moskën nga “armiqtë që ta përdorin këtë shtet për të kryer sulme ndaj Rusisë”.
Luftëtarët çeçenë, që janë besnikë të Kadyrovit, kanë reputacion famëkeq dhe akuzohen për shkelje të të drejtave të njeriut.
Rusia urdhëron ushtrinë të zgjerojë ofensivën në Ukrainë
Ushtarëve rusë u janë dhënë urdhra që të zgjerojnë ofensivën në Ukrainë “nga të gjitha drejtimet” pasi Kievi ka refuzuar që të zhvillojë bisedime me Moskën në Bjellorusi, tha të shtunën Ministria ruse e Mbrojtjes.
“Pasi pala ukrainase refuzoi procesin e negociatave, sot të gjitha njësive u është dhënë urdhri të zhvillojnë avancim nga të gjitha drejtimet në përputhje me planet operacionale”, tha përmes një deklarate zëdhënësi i ushtrisë ruse, Igor Konashenkov.
