Ukraina: Mbi 3,500 ushtarë rusë të vrarë
Ushtria ukrainase tha se mbi 3,500 ushtarë rusë janë vrarë që nga ndërhyrja e forcave ruse në Ukrainë, më 24 shkurt.
Në një postim në Facebook, ajo tha se rreth 200 të tjerë janë zënë robër.
Sipas saj, Rusia ka humbur edhe 14 avionë, tetë helikopterë dhe 102 tanke.
Radio Evropa e Lirë nuk ka mundur t’i konfirmojë në mënyrë të pavarur këto pretendime.
Rusia, deri më tash, nuk ka komentuar për viktimat apo humbjet tjera eventuale.
Mediat amerikane: Zelensky refuzoi ofertën për evakuim
Presidenti ukrainas, Volodymyr Zelensky, hodhi poshtë një ofertë të Uashingtonit për të ndihmuar në evakuimin e tij nga Ukraina, raportojnë mediat amerikane.
Zelensky tha se “lufta është këtu - unë kam nevojë për municion, jo për udhëtim”, raporton Associated Press, duke cituar një zyrtar të lartë të inteligjencës.
Washington Post citon gjithashtu zyrtarë amerikanë dhe ukrainas të kenë thënë se Qeveria amerikane është e përgatitur për të ndihmuar Zelenskyn.
“Kur të na sulmoni, do t’i shihni fytyrat tona, jo shpinën”, tha Zelensky të enjten, duke iu drejtuar ushtrisë ruse.
“Ne jemi të gjithë këtu dhe do të qëndrojmë kështu”, tha ai në një video të postuar në Facebook, ku dukej i shoqëruar nga ndihmësit e tij kryesorë.
Rusia pretendon kapjen e qytetit Melitopol
Trupat ruse kanë pushtuar qytetin Melitopol në rajonin jugor të Ukrainës, Zaporizhja, raportuan agjencitë ruse të lajmeve, Interfax dhe Sputnik, duke cituar Ministrinë ruse të Mbrojtjes.
Melitopol është një qytet me madhësi mesatare pranë portit kryesor të Ukrainës, Mariupol.
REL nuk ka mundur ta konfirmojë lajmin në mënyrë të pavarur.
Kievi goditet nga dy raketa
Agjencia e lajmeve Reuters raporton se zona në jugperëndim të kryeqytetit të Ukrainës, Kiev, është goditur mëngjesin e së shtunës nga dy raketa.
Tani për tani, është e paqartë se cilat ishin objektivat.
Sipas autoriteteve në Kiev, një nga raketat goditi një ndërtesë banimi.
Reuters raporton se një raketë ra në zonën afër aeroportit Zhuliany të kryeqytetit.
