Zyrtari ukrainas: Çernobili u kap nga forcat ruse
Uzina bërthamore e Çernobilit është pushtuar nga forcat ruse, tha të enjten një këshilltar i Zyrës presidenciale të Ukrainës, Mykhailo Podolyak.
“Është e pamundur të thuhet se termocentrali bërthamor i Çernobilit është i sigurt pas një sulmi krejtësisht të kotë nga rusët”, tha ai.
"Ky është një nga kërcënimet më serioze në Evropë sot", tha Podolyak.
Blinken bisedon me Borrellin për Ukrainën
Sekretari amerikan i Shtetit, Antony Blinken, ka zhvilluar një bisedë me shefin e diplomacisë së Bashkimit Evropian, Josep Borrell, për situatën e përshkallëzuar në Ukrainë.
“Dy liderët dënuan sulmin e paramenduar, të paprovokuar dhe të pajustifikueshëm ndaj Ukrainës nga forcat ushtarake ruse. Ata theksuan zotimin e tyre të fuqishëm për sigurinë evropiane si dhe për mbështetjen e sovranitetit dhe integritetit territorial të Ukrainës”, tha Ned Price, zëdhënës i Departamentit amerikan të Shtetit.
Sipas Departamentit amerikan të Shtetit, Blinken vlerësoi koordinimin e ngushtë midis SHBA-së dhe BE-së sa i përket agresionit rus në Ukrainë dhe së bashku me shefin e diplomacisë së bllokut evropian u zotuan për vendosjen e sanksioneve të ashpra ndaj Rusisë.
SHBA vendos sanksione të reja ndaj Rusisë
Presidenti i Shteteve të Bashkuara, Joe Biden, njoftoi se ka vendosur sanksione të reja ndaj Rusisë, pasi Moska nisi sulm ndaj Ukrainës.
Biden tha se presidenti rus, Vladimir Putin e refuzoi diplomacinë, duke thënë se sulmi i 24 shkurtit ndaj Ukrainës ishte i paprovokuar dhe i paramenduar.
"Putin e zgjodhi këtë luftë", tha Biden, duke shtuar se Rusia tani do "të bartë përgjegjësi" për veprimet e saj.
Presidenti amerikan tha se nuk ka plane që të bisedojë me Putinin.
Sipas Bidenit, në sanksione do të përfshihen edhe eksportet, por po ashtu bankat dhe oligarkët.
Në rundin e ri të sanksioneve, sipas presidentit Biden, janë vendosur edhe katër banka ruse.
“Kjo nënkupton që çdo aset që ato kanë në SHBA, do të ngrihen”, tha ai.
Biden tha se sanksionet po ashtu do të godasin sektorin e teknologjisë.
Presidenti Biden përsëriti qëndrimin se forcat amerikane nuk do të dërgohen në Ukrainë për të luftuar me Rusinë.
Pamjet e luftës në Ukrainë kujtojnë ankthin e luftës në Kosovë
Pushtimi i Ukrainës nga Rusia mëngjesin e 24 shkurtit, ka kthyer kujtimet e qytetarëve të Kosovës afro 23 vjet më parë, kur forcat ushtarake serbe, pas fillimit të bombardimeve të NATOS-s në caqet serbe, kishin nisur spastrimin etnik të shqiptarëve në Kosovë.
