Kurti takohet me komandantin e KFOR-it
Kryeministri i Kosovës, Albin Kurti, u takua me komandantin e forcave paqeruajtëse të NATO-s në Kosovë (KFOR), Gjeneral Major, Ferenc Kajári.
Sipas një njoftimi, në këtë takim, Kurti e njoftoi komandantin e KFOR-it për mbledhjen e Këshillit të Sigurisë, që u mbajt të mërkurën mbrëma “si dhe konkluzionet nga kjo mbledhje lidhur me bashkëpunimin dhe bashkërendimin sa më të ngushtë me NATO-n, Bashkimin Evropian, Shtetet e Bashkuara të Amerikës dhe Mbretërinë e Bashkuar”.
Qeveria e Kosovës, sipas njoftimit të zyrës së Kurtit, shprehu gatishmërinë që të bashkëpunojë dhe bashkërendojë veprimet me KFOR-in për një mjedis të qetë dhe të sigurt, “në shërbim të paqes, stabilitetit dhe sigurisë për të gjithë qytetarët e Republikës së Kosovës”.
Në këtë takim morën pjesë ministri i Brendshëm, Xhelal Sveçla dhe ministrin e Mbrojtjes, Armend Mehaj.
G7: Sulmi rus ndaj Ukrainës, kërcënim për rendin botëror
Grupi i shtatë vendeve më të industrializuar (G7) e kanë quajtur pushtim rus të Ukrainës “kërcënim serioz” për rregullin botëror dhe tha se presidenti rus, Vladimir Putin e vendosi veten në anën e gabuar të historisë duke nisur një luftë në Evropë.
Deklarata e G7-ës u lëshua pas takimit virtual që liderët zhvilluan më 24 shkurt, në ditën kur Rusia nisi operacion ushtarak ndaj Ukrainës, që u dënua nga shtetet në mbarë botën.
G7 tha se është “gati të veprojë” për ndërprerjet e mundshme të furnizimit me energji dhe tha se është gati të mbështesë me ndihmë humanitare, pasi pritet të ketë një valë të refugjatëve dhe personave që do të zhvendosen.
Presidenti i Shteteve të Bashkuara, Joe Biden, mori pjesë në takimin e G7-ës, grup në të cilin bëjnë pjesë edhe Britania, Kanadaja, Franca, Gjermania, Italia dhe Japonia.
Krerët shtetërorë të Kosovës dënojnë agresionin rus në Ukrainë
Krerët e institucioneve të Kosovës kanë dënuar agresionin ushtarak rus ndaj Ukrainës, si dhe vendimin e Moskës që të njohë si shtete të pavarura dy rajoneve lindore ukrainase, që kontrollohen nga separatistët pro-rusë.
“Strategjia e ndjekur nga Moska për të krijuar përmes agresionit ushtarak entitete fantome brenda territorit të Ukrainës, grumbullimi masiv i forcave ushtarake në kufijtë e Ukrainës dhe sulmi masiv dhe i paprovokuar kundër qyteteve dhe fshatrave të Ukrainës është një ndër goditjet më të rrezikshme që i është bërë arkitekturës së sigurisë ndërkombëtare të ndërtuara pas Luftës së Dytë Botërore”, u tha në deklaratën e përbashkët të presidentes së Kosovës, Vjosa Osmani, kyeparlamentarit, Glauk Konjufca, dhe kryeministrit, Albin Kurti.
Sipas udhëheqjes së Kosovës, sulmi ndaj Ukrainës është sulm ndaj vlerave demokratike.
“Sot, në Ukrainë nuk mbrohet vetëm sovraniteti dhe e drejta për vetëvendosje e një populli të lirë dhe e një shteti të pavarur. Por, në Ukrainë mbrohen vlerat universale të paqes, demokracisë dhe të drejtës së popujve për vetëvendosje”, u tha në deklaratë, ku u shtua se Kosova qëndron në solidaritet me popullin e Ukrainës.
Arrestohen protestuesit në Rusi
Qindra njerëz u mblodhën në qendër të Moskës të enjten, duke protestuar kundër sulmit të Rusisë ndaj Ukrainës. Shumë nga demonstruesit u arrestuan. Protesta të ngjashme u zhvilluan në qytete të tjera ruse dhe aktivistët u arrestuan gjithashtu.
Arrestohen protestuesit në Rusi