Bisedë me një shqiptar në Ukrainë
"S’kam para për të ikur jashtë shtetit", ka thënë Aleksandri, me të cilin Radio Evropa e Lirë ka biseduar rreth orës 13:00, më 24 shkurt.
Dëgjojeni një pjesë të rrëfimit të tij.
Hungaria dënon sulmin rus
Kryeministri hungarez, Viktor Orban, ka thënë se dënon veprimet ushtarake të Rusisë në Ukrainë, ashtu sikurse BE-ja dhe aleatët e NATO-s.
Si anëtare e bllokut evropian dhe NATO-s, e cila gjendet në kufi me Ukrainën, Hungaria nën Orbanin ka krijuar lidhje të ngushta me presidentin rus, Vladimir Putin.
Kjo gjë ka shqetësuar shumë partnerë të Perëndimit.
Orban, i cili me politikat e tij kundër migrimit ka sfiduar BE-në, ka thënë se një numër i refugjatëve ukrainas u janë afruar kufijve dhe se numri pritet të rritet.
Ai ka thënë se Hungaria është e “përgatitur për t’u kujdesur për ta dhe do ta përballojë këtë sfidë shpejt dhe në mënyrë efektive”.
Lavrov: Perëndimi nuk e respekton ligjin ndërkombëtar
Ministri i Jashtëm rus, Sergei Lavrov ka thënë se Rusia do të jetë gjithmonë e gatshme për dialog, pavarësisht se forcat ruse kanë nisur sulm ndaj Ukrainës.
“Fatkeqësisht, miqtë tanë perëndimorë nuk e respektojnë ligjin ndërkombëtar, duke tentuar ta shkatërrojnë atë dhe të promovojnë atë që e quajnë ‘rend të bazuar në rregulla’”, ka thënë Lavrov për agjencinë shtetërore të lajmeve, Ria Novosti.
“Ne kemi pasur diskutime intensive dhe të detajuara me kolegët tanë amerikanë, dhe anëtarët tjerë të NATO-s”, ka thënë ai.
Lavrov ka thënë se Rusia do të jetë “gjithmonë e gatshme për dialog, që do të na kthejë te drejtësia dhe parimet e kartës së Kombeve të Bashkuara”.
Si po sulmohet Ukraina?
Territori ukrainas është duke u sulmuar nga forcat ruse në disa drejtime:
- nga rajonet separatiste në Donbas në lindje,
- nga Bjellorusia në veri dhe
- nga Krimeja e pushtuar në jug, transmeton mediumi britanik, BBC,
Pjesa më e madhe e luftimeve besohet se është përqendruar në lindje.
Banorët e Harkivit, qytetit të dytë më të madh të Ukrainës, kanë thënë se dritaret e banesave janë dridhur nga shpërthimet e vazhdueshme.
Luftime janë raportuar edhe në kryeqytetin ukrainas, Kiev në veri dhe në qytetet Odesa dhe Mariupol në jug.
Sulmet ajrore nga Rusia janë kryer në bazat ushtarake ukrainase dhe aeroporte.
Ushtria ukrainase ka pretenduar se ka rrëzuar të paktën gjashtë aeroplanë, derisa Rusia beson se ka shkatërruar më shumë se 70 shënjestra ushtarake në Ukrainë, sipas BBC-së.
Shumë ukrainas po synojnë të gjejnë strehim apo të largohen nga qytetet e mëdha brenda Ukrainës.
Mijëra të tjerë janë parë duke u larguar nga Kievi.
