Pushtimi rus i Ukrainës

24 shkurt 2022

Rusia ka nisur pushtimin e paprovokuar të Ukrainës më 24 shkurt. Presidenti rus, Vladimir Putin, e ka cilësuar si "operacion special". Perëndimi e ka dënuar ashpër pushtimin dhe ka vendosur një varg sanksionesh të rënda kundër Rusisë.

Presidenti i Rusisë, Vladimir Putin, urdhëroi një “operacion ushtarak” në Ukrainë, në orën 5:55 të mëngjesit të 24 shkurtit, 2022. Disa minuta më vonë pasuan granatimet e para.
Presidenti i Ukrainës, Volodymyr Zelensky, shpalli gjendje lufte në vend.
Shtetet e Bashkuara, Bashkimi Evropian dhe NATO-ja e dënuan sulmin dhe u zotuan se do ta mbajnë Rusinë përgjegjëse.
Më 21 shkurt, presidenti rus, Vladimir Putin, ka marrë vendim për njohjen e rajoneve separatiste të Ukrainës, Donjeck dhe Luhansk, si shtete të pavarura, dhe ka urdhëruar vendosjen e forcave ruse në ato territore. Perëndimi e ka dënuar fuqishëm këtë veprim, duke e cilësuar si uvertyrë për pushtim të plotë.
Rusia ka grumbulluar më shumë se 150,000 forca të armatosura dhe pajisje të rënda ushtarake në kufijtë me Ukrainën - gjë të cilën NATO-ja e ka përshkruar si grumbullimin më të madh ushtarak në kontinentin evropian që nga fundi i Luftës së Ftohtë.
Udhëheqësi rus po përpiqet të parandalojë anëtarësimin e Ukrainës në NATO - gjë të cilën e ka cilësuar si kërcënim ekzistencial - dhe të ndalojë zgjerimin e aleancës perëndimore drejt lindjes.

15:23 24.2.2022

NATO, e gatshme të garantojë sigurinë në Ballkan

Në kohën kur NATO dhe Bashkimi Evropian janë bashkuar për të dënuar pushtimin rus në Ukrainë, pjesëtarë të aleancës kanë thënë për Radion Evropa e Lirë se janë të gatshëm të vazhdojnë të luajnë rol për të mbështetur paqen dhe sigurinë afatgjate në rajonin e Ballkanit Perëndimor.

“Politika e NATO-s në Kosovë dhe në Ballkanin Perëndimor ka qenë konsistente gjatë tërë kohës. Dhe kjo mbetet edhe tash. NATO mbetet tërësisht e përkushtuar që të luajë rolin e vet në mbështetje të sigurisë afatgjate përgjatë Ballkanit Perëndimor”, ka thënë një zyrtar i NATO-s, kur është pyetur nëse aleanca do të rrisë praninë në rajon për të parandaluar ndonjë destabilizim eventual të situatës.

15:31 24.2.2022

Nëse na jeni bashkuar tani, këto janë zhvillimet e fundit:

NATO është zotuar se do të mbrojë secilin “inç” të territorit të aleancës
Kremlini ka ripërsëritur thirrjet e presidentit rus, Vladimir Putin se Ukraina duhet të çmilitarizohet
Presidenti amerikan, Joe Biden ka kërkuar takim të Këshillit të Sigurisë Kombëtare
Presidenti francez, Emmanuel Macron e ka konsideruar sulmin rus si “pikë kthese” në historinë evropiane
Kancelari gjerman, Olaf Scholz e ka parë pushtimin rus si “luftë të Putinit”
Presidenti turk, Recep Tayyip Erdogan, ka thënë se sulmi përbën “goditje të rëndë për paqen dhe stabilitetin rajonal”.

15:42 24.2.2022

Ukraina bën thirrje për sanksione të ashpra ndaj Rusisë

Ministri i Jashtëm ukrainas, Dmytro Kuleba, u ka bërë thirrje shteteve tjera të vendosin sanksione ndaj Rusisë menjëherë dhe të ofrojnë mbështetje ushtarake dhe financiare për Ukrainën.

“Aktualisht, Putin është duke shtyrë Evropën në periudhën më të errët prej vitit 1939. Secila qeveri që tenton t’i shmanget është naive. Mos përsërisni gabimet e të kaluarës”, ka thënë Kuleba përmes një postimi në Twitter.

15:57 24.2.2022

Reagimi i Iranit

Ministri i Jashtëm iranian, Hossein Amir-Abdollahian, ka thënë se “kriza e Ukrainës i ka rrënjët në provokimet e NATO-s”.

“Ne nuk besojmë që lufta ofron zgjidhje. Është e domosdoshme që të ketë armëpushim dhe të gjendet një zgjidhje politike dhe demokratike”.

Shfaq më shumë

Ndërlidhjet

Na ndiqni

Pushtimi rus i Ukrainës