Johnson: Katastrofë për kontinentin tonë
Pushtimi i Ukrainës nga Rusia “është një katastrofë për kontinentin tonë”, shkroi në Twitter kryeministri britanik, Boris Johnson.
Ai paralajmëroi se do t’i drejtohet kombit gjatë ditës dhe se do të bisedojë me udhëheqësit e G7-ës, apo grupit të vendeve më të industrializuara.
Johnson po ashtu bëri thirrje për një takim urgjent të NATO-s.
Presidenti çek: Rusia të hiqet nga sistemi SWIFT
Presidenti i Çekisë, Millosh Zeman, i cili në të kaluarën ka promovuar marrëdhënie të ngrohta me Moskën, tha se sulmi rus kundër Ukrainës është "krim kundër paqes".
Ai bëri thirrje për vendosjen e sanksioneve të ashpra, përfshirë heqjen e Rusisë nga sistemi i pagesave ndërkombëtare SWIFT.
"Duhet të izolohet një i çmendur, jo vetëm të mbrohemi kundër tij me fjalë, por me masa konkrete", tha presidenti çek, duke iu referuar me sa duket homologut rus.
Moldavia mbyll hapësirën ajrore, mirëpret refugjatë ukrainas
Moldavia njoftoi se ka mbyllur hapësirën e saj ajrore, për shkak të luftës në Ukrainën fqinje.
Paraprakisht, presidentja Maia Sandu tha se Kishinjevi do të shpallë gjendje të jashtëzakonshme dhe se është i gatshëm të pranojë dhjetëra mijëra njerëz nga Ukraina.
"Ne do t'i ndihmojmë njerëzit që kanë nevojë për ndihmën dhe mbështetjen tonë", tha Sandu.
Ministrja e Brendshme e Moldavisë, Ana Revenco, tha se deri më tani afro 2,000 qytetarë ukrainas kanë kaluar në Moldavi.