Guvernatori ukrainas: Rafineria më e madhe e naftës është shkatërruar plotësisht
Një rafineri e naftës në qytetin Kremençuk, në Ukrainën qendrore, është shkatërruar plotësisht nga sulmet ruse, tha guvernatori i rajonit Poltava, raportoi Reuters.
“Zjarri në rafineri është shuar, por ndërtesa është shkatërruar plotësisht dhe më nuk mund të operojë”, citohet të ketë thënë guvernatori, Lunin Dmytro.
Gazeta Kyiv Independent ka raportuar se sulmet me raketa më 1 prill kanë shkatërruar rafinerinë e naftës, që është më e madhja në Ukrainë.
Kremençuk është një qytet kyç industrial në Ukrainë.
Neutraliteti i Ukrainës
Në rundin e fundit të negociatave direkte Ukrainë-Rusi, të mbajtur në Stamboll, negociatorët ukrainas u kanë paraqitur disa propozime homologëve rusë për ndaljen e agresionit. Mes tjerash, ata kanë dalë me idenë e statusit neutral për vendin e tyre, që do të thotë heqjen dorë nga çdo përpjekje për anëtarësim në ndonjë aleancë të huaj ushtarake. Në këmbim, ata kanë kërkuar garanci për sigurinë, që do të ofroheshin nga vende të tjera, si: Kanadaja, Turqia, apo Izraeli.
Për më shumë në këtë temë lexoni artikullin e mëposhtëm:
Rusia thotë se ka sulmuar rafineri të naftës në Odesa
Ministria e Mbrojtjes së Rusisë tha se forcat e saj kanë shkatërruar një rafineri të naftës dhe tri depo të karburanteve. Rusia tha se ka kryer sulme precize nga deti dhe me raketa në rajonin e Odesës, raportoi agjencia ruse e lajmeve Interfax.
Kjo ministri tha se kjo infrastrukturë është përdorur nga Ukraina për të furnizuar trupat e saj në afërsi të qytetit Mikolajiv.
Ndërkaq, më herët, zyrtarët ukrainas thanë se ende nuk kanë njoftime për viktima nga sulmet e mëngjesit të sotëm.
Nuk raportohet për viktima në Odesa
Zyrtari i ushtrisë ukrainase, Vladislav Nazarov, tha se deri më tani nuk ka njoftime për viktima nga sulmi në qytetin jugor të Odesës.
Ai shtoi se ndërtesa të infrastrukturës kritike janë dëmtuar nga sulmet me raketa, por nuk bëri të ditur se cilat ndërtesa kanë qenë cak i sulmeve.
Në mëngjesin e sotëm mediat raportuan për disa shpërthime në qytetin-port të Odesës. Zyrtarët ukrainas thanë se ky qytet është goditur nga sulme me raketa.