Kryqi i Kuq niset drejt Mariupolit
Kryqi i Kuq të shtunën po bën edhe një përpjekje për të evakuuar civilët nga Mariupoli, ku 160,000 persona besohet se kanë mbetur të bllokuar.
“Ekipi ynë është në lëvizje mëngjesin e sotëm nga Zaporizhja për në Mariupol. Nuk mund t’iu jap më shumë detaje në këto momente”, tha një zëdhënës i kësaj organizate.
Dje, Kryqi i Kuq e pati të pamundur që të arrinte në Mariupol, dhe u kthye në Zaporizhja. Kryqi i Kuq ishte nisur me 54 autobusë dhe disa vetura për të evakuuar banorët e Mariupolit, qytetit që është goditur më së rëndi nga sulmet ruse.
Ndërkaq, negociatorët ukrainas dhe rusë janë pajtuar për planin e evakuimit të civilëve nga qyteti i rrethuar i Mariupolit. Për këtë gjë ata u pajtuan në bisedimet në Stamboll, që u mbajtën më herët gjatë javës, tha një këshilltar i presidentit, Volodymyr Zelensky.
“Delegacioni ynë ka arritur marrëveshje në Stamboll për lejimin e evakuimit”, tha Oleksiy Arestovych për televizionin ukrainas.
“Mendoj se sot ose nesër do të dëgjojmë lajme të mira sa i përket evakuimit të banorëve të Maripolit”, shtoi ai.
Ndërkaq, mëngjesin e së shtunës, zyrtarët ukrainas thanë se shtatë korridore humanitare pritet të hapen sot, por sa i përket Mariupolit, tha se evakuimi nga atje ndoshta do të bëhet përmes transportit privat.
Sulme ndaj ndërtesave të banimit në lindje të Ukrainës
Rusia ka granatuar disa ndërtesa banimi në qyteti Lisiçansk dhe në qytetin Toshkiha, tha Serhiy Haidai, guvernatori i rajonit të Luhanskut, që gjendet në lindje të Ukrainës.
Ai shtoi se ende nuk kanë arritur të konfirmojnë numrin e viktimave nga këto sulme.
Presidenti ukrainas, Volodymyr Zelensky, paralajmëroi gjatë një video-mesazhi mëngjesin e së shtunës, se në pjesën lindore të vendit priten “beteja në të ardhmen”.
Trupat ruse po raportohet se po rigrupohen – duke u tërhequr nga zonat veriore pranë kryeqytetit ukrainas, Kiev – dhe pritet që të përqendrojnë operacionet e tyre në lindje dhe jug të Ukrainës.
UNESCO thotë se janë shkatërruar 53 vende historike në Ukrainë
Agjencia kulturore e Kombeve të Bashkuara, UNESCO, tha se të paktën 53 vende të rëndësishme kulturore janë shkatërruar në Ukrainë që prej nisjes së luftës.
Këtu janë përfshirë 29 kisha, 16 ndërtesa historike, katër muze dhe katër monumente.
Po ashtu UNESCO tha se janë dëmtuar disa vende historike në dy qytetet më të mëdha ukrainase, Kievi dhe Harkiv, ndërkaq në Çernihiv është shkatërruar një prej vendeve më të vjetra historike.
“Kjo është lista e fundit, por nuk është më përfshirësja, pasi ekspertët tanë po vazhdojnë të verifikojnë raportimet”, tha një zëdhënës i UNESCO-s për agjencinë AFP.
UNESCO tha se po përdor imazhet satelitore dhe dëshmitë e dëshmitarëve okularë për të verifikuar dëmet.
Mbështjellja e artit të Lvivit
Inteligjenca britanike: Forcat ruse janë tërhequr nga Aeroporti Hostomel
Forcat ruse raportohen se janë tërhequr nga Aeroporti Hostomel, afër kryeqytetit ukrainas, që ka qenë skenë e luftimeve që prej nisjes së konfliktit, tha inteligjenca ushtarake e Mbretërisë së Bashkuar.
“Forcat ukrainase vazhdojnë të avancojnë kundrejt tërheqjes së forcave ruse nga afërsia e Kievit”, tha Ministria e Mbrojtjes e Mbretërisë së Bashkuar.
“Përgjatë boshtit lindor Ukraina ka rimarrë disa fshatra. Në lindje të Ukrainës, forcat ukrainase kanë arritur të marrin një rrugë kyçe në Harkiv pas luftimeve të ashpra”, tha Ministria britanike e Mbrojtjes në informacionet e përditësuara të shtunën.
Në Hostomel ka pasur luftime të ashpra që prej 24 shkurtit, kur parashutistët rusë arritën me helikopterë dhe morën kontrollin e këtij aeroporti.
Hostomel është një qyteti i vogël, por me rëndësi të madhe strategjike. Para luftës, ai ishte aeroporti më i madh i mallrave në Ukrainë dhe shërbente si bazë kryesore për forcat ajrore ukrainase.