OKB-ja ka vështirësi për të ndihmuar qytetet në jug të Ukrainës
Koordinatorja humanitare e Kombeve të Bashkuara në Ukrainë thotë se OKB-ja dhe partnerët e saj kanë dorëzuar furnizime për mijëra njerëz në verilindje të vendit, por nuk kanë qenë në gjendje të arrijnë në disa qytete të rrethuara në jug.
Osnat Lubrani tha të enjten se nga racionet ushqimore nga organizata humanitare “People in Need” (Njerëzit në Nevojë) dhe Programi Botëror i Ushqimit i OKB-së do të përfitojnë rreth 6,000 njerëz në Sumy dhe disa zona të tjera.
Përveç kësaj, tha ajo, me gjësendet bazë shtëpiake, duke përfshirë batanijet dhe kazanët nga agjencia e refugjatëve të OKB-së, do të mbështesin 1,500 njerëz dhe do të ndihmojnë 6,000 njerëz me higjienë dhe ujë të pijshëm.
Ukraina: Një i vrarë nga sulmi rus në kolonën e evakuimit
Një person u vra dhe katër u plagosën rëndë kur forcat ruse bombarduan një kolonë evakuimi jashtë qytetit verior të Ukrainës, Çernihiv, thanë zyrtarët në Kiev të enjten.
"Pesë autobusë u vunë nën zjarr të drejtpërdrejtë nga armiku teksa ata u përpoqën të shkonin në qytetin e rrethuar për të evakuuar njerëzit," tha Avokatja i Popullit e Ukrainës, Lyudmyla Denisova në Telegram.
"Në autobusë kishte vetëm vullnetarë civilë. Si pasojë e granatimeve, një person ka mbetur i vdekur, katër janë plagosur rëndë", tha ajo
Rusia ia ndalon hyrjen udhëheqësisë së BE-së
Ministria e Jashtme e Rusisë tha të enjten se do të zgjerojë listën e saj të figurave të BE-së të cilëve u ndalohet hyrja në përgjigje të sanksioneve të vendosura ndaj Moskës për veprimet e saj ushtarake në Ukrainë.
“Kufizimet zbatohen për lidershipin më të lartë të Bashkimit Evropian, duke përfshirë një numër komisionerësh evropianë dhe drejtues të strukturave ushtarake të BE-së, si dhe shumicën dërrmuese të anëtarëve të Parlamentit Evropian që promovojnë politikat anti-ruse”, tha ministria në një deklaratë.
Britania dhe aleatët do të dërgojnë më shumë armë në Ukrainë
Britania e Madhe dhe aleatët e saj kanë rënë dakord të dërgojnë më shumë armë vdekjeprurëse në Ukrainë për të ndihmuar në mbrojtjen e saj kundër pushtimit rus, tha të enjten ministri britanik i mbrojtjes, Ben Wallace.
"Do të ketë më shumë ndihma vdekjeprurëse që do të shkojnë në Ukrainë si rezultat i ditës së sotme. Një numër vendesh kanë dalë ose me ide të reja ose me më shumë premtime parash," u tha Wallace gazetarëve pasi priti mbi 30 partnerë ndërkombëtarë në një konferencë.
Ai tha se ndihma përfshinte artileri me rreze më të gjatë, municione dhe më shumë armë kundërajrore.
