Mbretëria e Bashkuar prezanton ligje të reja që synojnë oligarkët rusë
Mbretëria e Bashkuar ka prezantuar ligje të reja që kanë për qëllim “t’ua parandalojnë oligarkëve rusë qasjen në shërbimet britanike të aviacionit dhe ato detare”.
Zyra e Jashtme britanike ka thënë se legjislacioni do të ndalojë mirëmbajtjen e aeroplanëve apo anijeve që u takojnë oligarkëve të sanksionuar rusë apo bizneseve të tyre.
Departamenti ka thënë se kompetencat e reja janë zbatuar menjëherë për të sanksionuar biznesmenët rusë, Eugene Shvidler dhe Oleg Tinkov.
Ndërkohë, sanksionet financiare, tregtare dhe ato të transportit, që janë vendosur në lidhje me Krimenë, janë zgjeruar edhe për rajonet Donjeck dhe Luhansk.
Sekretarja e Jashtme britanike Liz Truss ka thënë se “nuk ka dyshim që presidenti rus, Vladimir Putin dhe elita e tij janë befasuar nga fuqia e sanksioneve tona”.
“Ne do të vazhdojmë të rrisim presionin për aq kohë sa trupat ruse të jenë në Ukrainë, duke shënjestruar jo vetëm bizneset e oligarkëve, por edhe asetet e tyre dhe stilin e jetës”.
Shtëpia e Bardhë: Biden planifikon të ndajë 500 milionë dollarë për Ukrainën
Shtëpia e Bardhë ka njoftuar se presidenti amerikan, Joe Biden, i ka thënë homologut të tij ukrainas, Volodymyr Zelensky se Shtetet e Bashkuara synojnë të ndajnë 500 milionë dollarë amerikanë si ndihmë buxhetore direkte.
“Liderët kanë diskutuar sesi Shtetet e Bashkuara janë duke punuar vazhdimisht për të përmbushur kërkesat kryesore të Ukrainës për ndihmë në fushën e sigurisë, efektet kritike që kanë pasur këto armë në konflikt, dhe përpjekjet e vazhdueshme të Shteteve të Bashkuara dhe aleatëve për të identifikuar kapacitete shtesë, për t’i ndihmuar ushtrisë ukrainase që të mbrojë shtetin e saj”, është thënë në deklaratë.
Biden po ashtu ka rishikuar sanksionet dhe ndihmën humanitare të javës së kaluar, derisa Zelensky e ka njoftuar atë për negociatat e Ukrainës me Rusinë.
Në kërkim të superjahteve të oligarkëve rusë
Superjahtet e shtrenjta, në pronësi të oligarkëve rusë, po përballen me sfida ligjore, teksa autoritetet në mbarë botën po veprojnë në bazë të sanksioneve ndërkombëtare që kanë për qëllim t’i bëjnë presion personave që janë të afërt me presidentin rus, Vladimir Putin. Një numër anijesh, vlera e përgjithshme e të cilave vlerësohet të jetë të paktën 1.6 miliard dollarë, janë konfiskuar deri më tani. Rasti i fundit i konfiskimit të një jahti ndodhi në Londër më 29 mars. Në këtë fotogaleri iu tregojmë jahtet e konfiskuara dhe pronarët e tyre, por edhe për disa anije që janë në shënjestër të autoriteteve, përfshirë edhe një jaht që është i lidhur me vetë Putinin.
Në kërkim të superjahteve të oligarkëve rusë
Ku kanë ikur refugjatët nga Ukraina?
Kombet e Bashkuara kanë thënë se mbi katër milionë banorë të Ukrainës kanë ikur nga ky shtet, prej shpërthimit të luftës më 24 shkurt.
Më shumë se gjashtë milionë njerëz janë zhvendosur brenda Ukrainës, çka nënkupton se në total, një çerek i popullsisë ka braktisur shtëpitë për shkak të luftës.
Kriza me refugjatët ukrainas është më e madhja në Evropë pas Luftës së Dytë Botërore.
Deri më 29 mars:
- Polonia ka pranuar 2,336,799 refugjatë
- Rumania 608,936
- Moldavia 387,151
- Hungaria 364,804
- Rusia 350,632
- Sllovakia 281,172 dhe
- Bjellorusia 10,902