Pentagoni: Rusia po ripozicionon forcat afër Kievit
Zëdhënësi i Pentagonit, John Kirby, ka thënë se Rusia është duke “ripozicionuar” forcat e saj afër Kievit, mirëpo nuk është duke i tërhequr ato, andaj qyteti është nën rrezik.
“Po shohim numër të vogël që duket se po largohet, në ditën e njëjtë që rusët kanë thënë se po tërhiqen”, u ka thënë Kirby gazetarëve.
“Por ne nuk jemi të përgatitur për ta quajtur këtë gjë tërheqje”, ka thënë ai.
“Ne mendojmë se ata kanë në mendje ripozicionimin për të bërë prioritet diçka tjetër”.
Kjo deklaratë e Pentagonit vjen pasi Rusia është zotuar se do të “zvogëlojë në mënyrë drastike” veprimet ushtarake afër Kievit dhe Çernihivit.
Zelensky thotë se bisedimet me Rusinë mund të konsiderohen pozitive, por kërkon rezultate
Presidenti ukrainas, Volodymyr Zelensky, ka thënë të martën se sinjalet nga bisedimet për paqe me Rusinë, mund të konsiderohen pozitive, mirëpo ka shtuar se ato nuk kanë ndalur shpërthimet nga ana e Rusisë.
Në një adresim në orët e mbrëmjes, ai ka thënë se Kievi nuk ka arsye për të besuar në fjalët e disa përfaqësuesve rusë dhe ka thënë se Ukraina mund t’iu besojnë vetëm rezultateve konkrete nga takimet.
Senatorët amerikanë duan që Rusia të largohet nga Këshilli i OKB-së për të Drejta të Njeriut
Disa anëtarë të Komitetit të Senatit për Marrëdhënie me Jashtë, i kanë bërë thirrje administratës së presidentit amerikan, Joe Biden që të çojë përpara propozimin për largimin e Rusisë nga Këshilli i Kombeve të Bashkuara për të Drejta të Njeriut, duke përmendur pushtimin rus në Ukrainë.
Në një letër dërguar nga tetë demokratë dhe katër republikanë, i është kërkuar ambasadores amerikane në OKB, Linda Thomas-Greenfield, që të prezantojë një rezolutë për largimin e Rusisë nga ky institucion, pas raportimit për viktima, si dhe shkatërrim të ndërtesave të banimit, spitaleve dhe shkollave në Ukrainë.
