Abramovich merr pjesë në bisedimet Ukrainë-Rusi në Stamboll
Miliarderi Roman Abramovich, një prej oligarkëve rusë të sanksionuar nga Perëndimi për shkak të pushtimit rus të Ukrainës, po merr pjesë në bisedimet midis delegacioneve ukrainase dhe ruse në Stamboll, që po mbahen sot, raportoi Reuters.
Kremlini më herët ka thënë se Abramovich ka luajtur rol në bisedimet e mëhershme të paqes.
Ky lajm vjen një ditë pasi Wall Sreet Journal raportoi se Abramovich dhe negociatorët ukrainas për paqe janë përballur me pasoja të helmimit të dyshuar më herët gjatë këtij muaji.
Ndërkaq, Sky News ka cituar ministrin e Jashtëm ukrainas, Dmytro Kuleba, të ketë paralajmëruar pjesëtarët e delegacionit ukrainas, që gjatë takimit me palën ruse të mos hanë apo pinë.
“I kam këshilluar që kushdo që shkon në bisedime me Federatën Ruse të mos ha dhe pi asgjë, dhe është e preferueshme që të shmangin edhe prekjen e sipërfaqeve”, është cituar të ketë thënë Kuleba.
Ukraina shpreson në hapjen e korridoreve humanitare
Ukraina shpreson që të jetë në gjendje të evakuojë civilët nga disa qytete të rrethuara, tha zëvendëskryeministrja e Ukrainës, Iryna Vereshchuk.
Kjo nënkupton edhe hapjen e korridoreve humanitare në qytetin-port të Mariupolit – qytet i rrethuar ku 160,000 banorë janë të bllokuar – dhe që evakuimi të bëhet përmes makinave private, shkroi Reuters.
Të hënën, Ukraina paralajmëroi se disa rrugë ishin të pasigurta për shkak të sulmeve të mundshme nga forcat ruse.
Erdogan: Bisedimet e Stambollit mund të hapin rrugë për takimin Zelensky-Putin
Presidenti i Turqisë, Recep Tayyip Erdogan, tha se bisedimet midis negociatorëve rusë dhe ukrainas, që mbahen sot në Stamboll, mund të hapin rrugë për takimin e liderëve të Ukrainës dhe Rusisë.
Në një adresim para negociatorëve, Erdogan tha se është koha që bisedimet të japin rezultate konkrete dhe bëri thirrje për armëpushim të menjëhershëm, duke shtuar se “ndalja e kësaj tragjedie” varet nga të dy palët.
Erdogan tha se si presidenti ukrainas, Volodymyr Zelensky, ashtu edhe ai rus, Vladimir Putin, ishin “miq të çmuar”.
Presidenti turk tha se të dy palët kanë “shqetësime legjitime”, por shtoi se ka ardhur koha që bisedimet të japin rezultate konkrete.
Mbretëria e Bashkuar: Rusia po rivendos forcat e saj
Ministri e Mbrojtjes së Mbretërisë së Bashkuar tha se forcat ukrainase kanë kryer kundërsulme të “lokalizuara” në veriperëndim të Kievit, të cilat kanë rezultuar me njëfarë suksesi, duke zmbrapsur rusët nga një sërë pozicionesh.
Në informacionet e përditësuara lidhur me luftën në Ukrainë, Mbretëria e Bashkuar paralajmëroi se forcat ruse ende paraqesin rrezik të madh për kryeqytetin ukrainas, Kiev, për shkak të aftësive të tyre për të kryer sulme ajrore.
Në jug të Ukrainës, sipas Ministrisë britanike të Mbrojtjes, Rusia ka vazhduar ofensivën në Mariupol, duke kryer granatime, por tha se forcat ukrainase ende kanë nën kontroll qendrën e qytetit.
Në pjesë të tjera të Ukrainës, forcat ruse, po “mbajnë pozicionet bllokuese, teksa po tentojnë të riorganizohen dhe të rivendosin forcat e tyre”, tha kjo ministri.
