Policia e Kosovës konfirmon sulmin ndaj një veture policore në Zveçan
Policia e Kosovës e ka konfirmuar se të mërkurën në Zveçan është dëmtuar një automjet i saj zyrtar në Zveçan.
Sipas Policisë, sulmi ka ndodhur rreth orës 14:00, derisa njësia policore ka qenë duke patrulluar afër objektit të komunës në Zveçan.
Sipas saj, sulmi dyshohet të jetë kryer nga një grup i personave, të cilët kanë gjuajtur me mjete të forta.
Nuk ka raportime për të lënduar, derisa Policia ka thënë se rasti është duke u hetuar.
Përfundon protesta në Zubin Potok
Ekipi i Radios Evropa e Lirë në Zubin Potok ka konfirmuar përfundimin e protestës së serbëve lokalë në këtë komunë.
Protestuesit kanë qenë para objektit të komunës prej orëve të hershme të mëngjesit.
Ndërkohë, në Zveçan, për shkak të shiut të madh, protestuesit janë larguar nga rruga, por protesta nuk është shpallur e përfunduar.
Ministri serb viziton një pjesë të forcave aktive të ushtrisë serbe
Ministria e Mbrojtjes e Serbisë ka raportuar se, zëvendëskryeministri dhe ministri i Mbrojtjes i Serbisë, Millosh Vuçeviq, e ka vizituar më 31 maj një pjesë të forcave aktive të Forcave të Armatosura të Serbisë. Presidenti serb, Aleksandar Vuçiq, ka dhënë ditë më parë urdhër për ngritjen e gatishmërisë luftarake të ushtrisë serbe në nivelin më të lartë, për shkak të situatës në Kosovë.
KFOR-i patrullon rrugëve të Zveçanit
Ekipi i Radios Evropa e Lirë i ka parë disa patrulla të KFOR-it amerikan në rrugët e Zveçanit, në pasditen e së mërkurës.
Edhe kryetari i Listës Serbe – partisë më të madhe të serbëve në Kosovë – Goran Rakiq, ia ka bërë KFOR-it kërkesën për patrullim nëpër rrugë, pak orë më parë.
Sipas tij, arsye për këtë kërkesë është që “Policia e Kosovës të mos afrohet dhe të ngrejë tensione”.
Pas përleshjeve të së hënës, mes protestuesve serbë dhe pjesëtarëve të KFOR-it në këtë komunë, pjesëtarët e misionit paqeruajtës janë parë vetëm afër objektit komunal.
