Qetësohet situata në Mitrovicë të Veriut

Gazetarët e Radios Evropa e Lirë raportojnë për një situatë të tensionuar në Zveçan, ku grupe të serbëve lokalë - mes tyre disa edhe me maska e kapele - qëndrojnë të tubuar para ndërtesës së komunës.

Kordoni i pjesëtarëve të KFOR-it është vënë në afërsi të objektit, ndërsa pjesëtarë të Policisë së Kosovës nuk shihen aty. Sipas raportimeve, policët e Kosovës janë brenda objektit komunal.

Në Zubin Potok raportohet për situatë më të qetë, edhe pse grupe qytetarësh vazhdojnë të qëndrojnë afër ndërtesës së komunës edhe atje. Ngjashëm është situata edhe në Leposaviq, ku një numër njerëzish u larguan nga protesta.

Gazetarët e Radios Evropa e Lirë në Zubin Potok raportojnë se sërish janë ndezur sirenat e alarmit dhe se protestuesit janë duke iu afruar kordonit të policisë që po ruan objektin komunal.

Përshëndetje për të gjithë ju që sapo na jeni bashkuar:

• Në komunat veriore Zveçan, Zubin Potok dhe Leposaviq, grupe të qytetarëve serbë janë duke vazhduar protestat kundër kryetarëve të rinj shqiptarë. Situatë më e tensionuar raportohet në Zveçan, ku shihen edhe protestues të maskuar.
• Përfaqësuesit politikë të serbëve kërkuan nga misioni paqeruajtës KFOR dhe ambasadorët e huaj që të mos e lejojnë hyrjen e kryetarëve në objektet komunale. Ata kërkuan edhe tërheqjen e njësiteve speciale të Policisë së Kosovës nga veriu i banuar me shumicë serbe. Përgjigje në këto kërkesa nuk ka ende.
• Ambasadori amerikan në Prishtinë, Jeffrey Hovenier, priti në takim kryetarët e komunave të Zubin Potokut dhe Zveçanit. Hovenier tha se “është e rëndësishme që të shmangen situatat në të cilat zyrtarët publikë hyjnë në ndërtesat publike përmes përdorimit të forcës”.
• Derisa nga Qeveria e Kosovës nuk ka ndonjë reagim, në Serbi, ministri i Mbrojtjes, Millosh Vuçeviq, tha se deri në orën 14:00 do të përfundojë dislokimi i plotë i njësive të Forcave të Armatosura të Serbisë, në përputhje me urdhrin e presidentit Aleksandar Vuçiq për rritjen e gatishmërisë luftarake.