AGK raporton për tentim-sulme dhe vandalizime në veri
Asociacioni i Gazetarëve të Kosovës raportoi për tentim-sulme kundër disa gazetarëve në veri të Kosovës, ku grupe serbësh lokalë janë duke protestuar sot kundër kryetarëve të rinj shqiptarë të komunave Zveçan, Zubin Potok dhe Leposaviq.
Në postimet e bëra në mediat sociale shihen disa makina të mediave të vandalizuara.
Daçiq paralajmëron për "destabilizim të rajonit"
Ministri i Punëve të Jashtme i Serbisë, Ivica Daçiq, tha se “aktet e njëanshme” të autoriteteve të Kosovës rrezikojnë ta destabilizojnë rajonin dhe u bëri thirrje përfaqësuesve të bashkësisë ndërkombëtare që t'i marrin seriozisht ato.
Deklarata e Daçiqit vjen pasi grupe serbësh në Zveçan, Leposaviq dhe Zubin Potok u mblodhën të hënën për të kundërshtuar edhe një herë kryetarët e rinj të këtyre komunave në veri të Kosovës - që të gjithë shqiptarë - të zgjedhur në zgjedhjet e jashtëzakonshme të 23 prillit.
“Prishtina është kërcënimi më i madh për paqen dhe stabilitetin rajonal për momentin”, tha Daçiq.
Video nga situata në veri të Kosovës:
Kurti: Gjendja e tanishme kërkon të qetësohet situata në veri
Kryeministri i Kosovës, Albin Kurti, tha se gjendja e tanishme kërkon që të zbatohet Marrëveshja Bazë për normalizimin e marrëdhënieve Kosovë-Serbi, si dhe të qetësohet situata në veri të Kosovës.
Përmes një postimi në Twitter, Kurti tha se i ka bërë këto komente gjatë një bisede telefonike me ministrin e Jashtëm Italian, Antonio Tajani.
Ai nuk dha detaje të tjera.
Tensionet në veri të Kosovës janë rritur, pasi grupe të serbëve lokalë janë duke protestuar kundër kryetarëve të rinj shqiptarë të komunave: Zveçan, Zubin Potok dhe Leposaviq.
Të premten e kaluar, Policia e Kosovës ka hyrë me forcë në këto komuna për t’i instaluar kryetarët e rinj.
Përleshjet me protestuesit serbë kanë rezultuar me pesë policë të plagosur dhe disa makina të djegura.
Kurti i ka mbrojtur veprimet e policisë, ndërsa bashkësia ndërkombëtare i ka dënuar ashpër ato, duke paralajmëruar se minimizojnë përpjekjet për normalizimin e marrëdhënieve Kosovë-Serbi.
Lista Serbe në negociata me KFOR-in: Policia e Kosovës të zëvendësohet nga KFOR-i
Përfaqësuesit e Listës Serbe, Igor Simiq dhe Dragisha Milloviq, biseduan me kolonelin e paqeruajtësve amerikanë të KFOR-it në Zveçan dhe kërkuan që policët e Kosovës në këtë komunë të zëvendësohen nga KFOR-i.
Situata në Zveçan, Leposaviq dhe Zubin Potok mbetet e tensionuar, pasi grupe serbësh lokalë janë mbledhur para objekteve komunale për të kundërshtuar kryetarët e rinj shqiptarë.
"Mund të them se ka qenë vërtet një bisedë korrekte, se koloneli e kupton situatën në të cilën jemi të gjithë. Kërkesa jonë ka qenë që njësitë speciale të tërhiqen nga ndërtesa e komunës, të largohen nga ndërtesa e komunës dhe sigurinë ta marrë KFOR-i. Ai [koloneli] po flet tani me komandantin e përgjithshëm të KFOR-it për kërkesën tonë", tha Milloviq para të të tubuarve.
"Presim përgjigje se çfarë do të na thotë koloneli amerikan i KFOR-it", shtoi ai.
