Qetësohet situata në Mitrovicë të Veriut

Njohësi i fushës së sigurisë në Kosovë, Nuredin Ibishi, tha se situata në pjesën veriore të vendit mbetet e tensionuar, pasi reagimet e komunitetit ndërkombëtar kundër vendosjes së kryetarëve të komunave në Zveçan, Zubin Potok, Leposaviq dhe Mitrovicë e Veriut, i kanë frymëzuar, sipas tij, serbët lokalë që të vazhdojnë kundërshtimin.

“Kjo frymëzoi edhe më shumë sidomos [presidentin e Serbisë, Aleksandar] Vuçiq, [ministrin e Punëve të Jashtme, Ivica] Daçiq si dhe Listën Serbe, që të vazhdojnë me kundërvënie, që me çdo kusht të largohen kryetarët e komunave si dhe prezenca e Policisë së Kosovës”, tha Ibishi për Radion Evropa e Lirë.

Ai tha se reagimi i qytetarëve serbë atje ka qenë i pritshëm, pasi, sipas tij, zyrtarët e Listës Serbe e kishin paralajmëruar një gjë të tillë ditë më parë.

Ibishi tha se Policia e Kosovës ka vepruar në mënyrë profesionale dhe proporcionale që nga 26 maji kur asistoi kryetarët e rinj që të vendosen në objektet komunale në Leposaviq, Zveçan dhe Zubin Potok.

Raportuesja për Kosovën në Parlamentin Evropian, Viola von Cramon, u shpreh e shqetësuar nga situata në veri të Kosovës gjatë një konference për media në Prishtinë, ku tha se Qeveria e vendit “duket se po rrezikon shumë me këto manovra në veri”.

“Natyrisht, kryetarët e zgjedhur janë zgjedhur në mënyrë ligjore. Por, kjo nuk do të thotë se ata kanë legjitimitetin për të hyrë në këto objekte dhe të kenë qasje me forcë. Askush nuk mund të udhëheqë me një apo dy për qind të votave”, tha Von Cramon.

Ajo i bëri thirrje Qeverisë së Kosovës ta pyesë veten “nëse kjo është qeverisje e mirë”, teksa shtoi se duhet të punohet në ndërtimin e besimit me komunitetin serb në veri të Kosovës.

Të tubuarit në Zveçan nuk i përfillën thirrjet e kryetarit të Listës Serbe, Goran Rakiq, për të lejuar kalimin e dy automjeteve të Policisë së Kosovës.

Në vend të ngjarjes duket një numër i madh njerëzish - mes tyre edhe me maska.

Aty gjenden edhe pjesëtarë të Policisë së Kosovës, edhe të misionit paqeruajtës të NATO-s, KFOR.

Më herët, Rakiq tha se ua ka përcjellë dy kërkesa përfaqësuesve të KFOR-it dhe ambasadorëve të huaj në Prishtinë, në mënyrë që protestuesit serbë të tërhiqen nga ndërtesat e komunave në veri, ku edhe janë tubuar.

"Kërkesat tona janë që sherifët - siç e quajnë veten - të paligjshëm, të shkojnë në shtëpitë e tyre dhe t'i udhëheqin të afërmit e tyre. Dhe, të gjitha njësitë speciale në ndërtesën e komunës, përreth komunës, të tërhiqen në jug, sepse ky nuk është stacion policie, është bashki e qytetit", tha Rakiq, duke folur nga Zveçani.

Ministri serb i Mbrojtjes, Millosh Vuçeviq, tha se deri në orën 14:00 do të përfundojë dislokimi i plotë i njësive të Forcave të Armatosura të Serbisë, në përputhje me urdhrin e presidentit Aleksandar Vuçiq për rritjen e gatishmërisë luftarake.

Në veri të Kosovës, grupe serbësh lokalë u mblodhën sërish të hënën për të kundërshtuar kryetarët e rinj shqiptarë të komunave Zveçan, Zubin Potok dhe Leposaviq.

Të premten e kaluar, protestuesit serbë u përleshën me Policinë e Kosovës, e cila i ndihmoi kryetarët për t’u vendosur në objektet komunale.

Në përgjigje, Vuçiq dha urdhër për rritjen e gatishmërisë luftarake të ushtrisë serbe.

“Njësitë e ushtrisë serbe do të jenë të përgatitura për të zbatuar çdo urdhër, me shpresë se do të gjendet një zgjidhje politike”, tha Vuçeviq.

Ai shtoi se gatishmëria luftarake e Forcave të Armatosura të Serbisë është rritur për të bërë me dije se “ka vija të kuqe”.