10:57
29.5.2023
Sirena alarmi në Zubin Potok
Gazetarët e Radios Evropa e Lirë në Zubin Potok raportojnë se atje janë aktivizuar sirenat alarmuese dhe se një grup i qytetarëve serbë vazhdon të protestojë para ndërtesës së komunës.
11:07
29.5.2023
KFOR-i bën thirrje për përmbajtje
Misioni paqeruajtës i NATO-s në Kosovë, KFOR, u bëri thirrje të gjitha palëve që të përmbahen nga veprimet “që mund të nxisin tensione apo të shkaktojnë përshkallëzim”.
KFOR-i tha se, në përputhje me mandatin që ka, është i gatshëm “t’i ndërmarrë të gjitha masat për të ofruar një mjedis të sigurt, në një mënyrë neutrale dhe të paanshme”.
Ky mision konfirmoi se mëngjesin e 29 majit ka shtuar praninë në komunat në veri të Kosovës, pas rritjes së tensioneve.
Për më shumë, lexoni këtu.
11:39
29.5.2023
Hovenier: Të shmanget hyrja me forcë në ndërtesat komunale
Ambasadori i Shteteve të Bashkuara në Prishtinë, Jeffrey Hovenier, tha se ka biseduar me kryetarët e Zubin Potokut dhe të Zveçanit për situatën aktuale në veri të Kosovës.
Duke folur për gazetarët, Hovenier tha se “është e rëndësishme që të shmangen situatat në të cilat zyrtarët publikë hyjnë në ndërtesat publike përmes përdorimit të forcës”.
Hovenier tha se ky është qëndrim i SHBA-së dhe i vendeve të tjera të Quint-it: Mbretërisë së Bashkuar, Italisë, Francës dhe Gjermanisë.
“Në takim me kryetarët biseduam se si ata mund t’i përmbushin detyrat e tyre, për t’iu shërbyer të gjithë qytetarëve, në një mënyrë që tregon përgjegjësi ndaj të gjithë qytetarëve, dhe diçka e tillë, sipas nesh, tani nënkupton moshyrje në ndërtesë me forcë”, tha Hovenier.
Takimi u zhvillua në Zyrën e Bashkimit Evropian në Prishtinë, ku i pranishëm ishte edhe shefi i kësaj zyre, Tomas Szunyog.
Hovenier tha se në takim janë ftuar të katër kryetarët e komunave me shumicë serbe në veri, por se të pranishëm ishin vetëm ai i Zveçanit dhe i Zubin Potokut - që të dy nga Partia Demokratike e Kosovës në opozitë.
Hovenier tha se ka takuar më pas edhe presidenten e Kosovës, Vjosa Osmani, me të cilën tha se ka diskutuar për situatën në veri.
