Clinton del në epërsi
Mediat amerikane raportojnë se kandidatët për president të SHBA-së, Donald Trump dhe Hillary Clinton, po "luftojnë fyt më fyt me vota".
Në Kolegjin Zgjedhor aktualisht prin Clinton me 197 vota, përballë Trumpit me 187.
Për të fituar, kandidatit i duhen 270 vota.
Tërbohen tregjet, dollari dhe nafta
Tregjet globale të aksioneve dhe dollari amerikan kanë shkuar në rënie të lirë, pasi kandidati republikan për president të SHBA-së, Donald Trump, kryeson garën për Shtëpinë e Bardhë.
Aksionet e Tokios kanë rënë për gati 5 përqind më 9 nëntor, ndërsa indekset e Hong Kongut dhe Seulit për 3.3 përqind, respektivisht 2.8 përqind.
Indeksi Wall Street, ndërkaq, ka rënë për 3 përqind.
Dollari amerikan po ashtu ka rënë kundrejt jenit dhe euros.
Çmimet e naftës gjithashtu kanë rënë për më shumë se 4 përqind, në 43.17 dollarë për fuçi.
Shumica e tregjeve kanë favorizuar kandidaten demokrate, Hillary Clinton, përballë Trumpit, pasi investitorët i kanë parë politikat e saj si vazhdim i "status quo"-së që ka krijuar presidenti Barack Obama.
Dyzet milionë postime për zgjedhjet në Twitter
Twitter ka raportuar 40 milionë postime, vetëm më 8 nëntor, të cilat lidhen me zgjedhjet në Shtetet e Bashkuara.
Për krahasim, në ditën e zgjedhjeve më 2012, janë bërë 31 milionë postime.
Trump forcon epërsinë ndaj Clintonit
Kandidati republikan për president të SHBA-së, Donald Trump, ka forcuar epërsinë e tij në Kolegjin Zgjedhor.
Trump ka fituar shtete të mëdha si Teksasi dhe disa shtete jugore dhe qendrore.
Kandidatja demokrate, Hillary Clinton, ka fituar në Nju Jork, në Illinois dhe në shumicën e shteteve verilindore, por mbetet prapa Trumpit në garën për 270 votat e nevojshme nga Kolegji Zgjedhor.
Të dyja fushatat po presin me ankth Pensilvaninë, Karolinën e Veriut, Floridën, Virxhinian dhe Ohajon.