Obama: Thirrje për unitet, pavarësisht rezultatit
Presidenti i Shteteve të Bashkuara, Barack Obama, u bëri thirrje amerikanëve që të mbeten të bashkuar, pavarësisht rezultatit të zgjedhjeve të 8 nëntorit.
Zgjedhjet kanë qenë rraskapitëse, të vështira dhe nganjëherë të çuditshme, tha Obama në një video që ueb-faqja amerikane Buzzfeed ka postuar në Twitter.
"Pa marrë parasysh se çfarë ndodh, dielli do të lindë në mëngjes dhe Amerika prapë do të jetë vendi më i madh në Tokë", tha Obama.
Ai shtoi se qytetarët nuk duhet ta konsiderojnë veten demokratë ose republikanë, por amerikanë.
Trump në avantazh të konsiderueshëm
Kandidatja demokrate për presidente të Shteteve të Bashkuara, Hillary Clinton, ka fituar në Nju Jork, por rivali i saj republikan, Donald Trump, ka kapur Teksasin, i cili i ka dhënë një avantazh të konsiderueshëm në Kolegjin Zgjedhor.
Pas mbylljes së vendvotimeve në shtetet qendrore, lindore dhe jugore, fitoret e parashikuara për Trumpin i japin atij udhëheqje solide në votën popullore dhe në numërimin e Kolegjit Zgjedhor.
Të dyja fushatat po presin me ankth rezultatet në shtetet e cilësuara si fushëbeteja: Pensilvani, Karolina e Veriut dhe Ohajo.
Analistët po vëzhgojnë nga afër edhe Floridën.
Virxhinia gjithashtu duket se është e prirë kah republikanët, çfarë do të ishte një goditje e madhe për Clintonin.
Republikanët parashihet se do të dominojnë Dhomën e Përfaqësuesve
Parashikimet e dy rrjeteve televizive në SHBA tregojnë se Partia Republikane do të vazhdojë të mbajë shumicën në Dhomën e Përfaqësuesve.
Duke u thirrur në rezultatet e hershme të zgjedhjeve të 8 nëntorit, NBC dhe ABC thonë se republikanët do të mbajnë së paku 218 ulëse nga 435 sa janë gjithsej.
Republikanët kontrollojnë Dhomën e Përfaqësuesve që gjashtë vjet.
Clinton del para Trumpit në numërimin e Kolegjit Zgjedhor
Kandidatja demokrate për presidente të SHBA-së, Hillary Clinton, kryeson në numërimin e Kolegjit Zgjedhor.
Clinton ka fituar disa shtete verilindore, të cilat e kanë nxjerrë në epërsi përballë rivalit republikan, Donald Trump.
Trump ka shënuar fitore në Kentaki, Indiana, Karolinën e Jugut dhe Oklahoma, por të dyja fushatat janë duke pritur me padurim numërimin e votave në shtetet me popullsi më të mëdha, që ofrojnë po ashtu më shumë vota të domosdoshme elektorale.
Shtetet që duhet të fitohen përfshijnë Floridën, Ohajon dhe Karolinën e Veriut.
