Ushtria ukrainase qëndron prapa sulmit me dronë në një fushë ajrore qindra kilometra brenda Rusisë, thanë burimet e sigurisë për Radion Evropa e Lirë të enjten.
Ndërkohë, presidenti i Ukrainës, Volodymyr Zelensky, udhëtoi për në rajonin Sumi të Ukrainës, i cili ndodhet në kufi me Kurskun, për herë të parë prej se Kievi e nisi një inkursion befasues në këtë rajon rus më 6 gusht.
Shërbimi i Sigurisë Shtetërore i Ukrainës (SBU), së bashku me Forcat për Operacione Speciale, e goditën më 22 gusht fushën ajrore Marinovka në rajonin Volgogard të Rusisë, i cili ndodhet 275 kilometra në lindje të kufirit me Ukrainën, thanë burime brenda SBU-së për Radion Evropa e Lirë.
Lexoni edhe këtë: Raportohet se Kremlini po përgatitet për “muaj luftimesh” në KurskNë shënjestër të sulmit ishin një depo e naftës, raketat antitanke dhe bomba rrëshqitëse, tha një burim i sigurisë.
Inteligjenca ukrainase kohëve të fundit është përqendruar në sulme kundër fushave ajrore brenda Rusisë, të cilat përdoren nga Moska për sulme ndaj infrastrukturës civile në Ukrainë.
Burimi i SBU-së tha se fusha ajrore Marinovka është përdorur për qëllime të ngjashme.
Bombat rrëshqitëse janë bomba që shkrepën nga avionët luftarakë nga një largësi e mjaftueshme sa për ta shmangur zjarrin e armikut.
Rusia i ka përdorur shumë bombat e tilla kundër qyteteve ukrainase. Prodhimi i tyre nuk kushton shumë.
Më herët, kanalet ruse në Telegram, duke cituar dëshmitarët, raportuan për një sërë shpërthimesh në Marinovka. Kanali Astra në Telegram e postoi një video që shfaq një shpërthim të madh dhe tym të zi duke u ngritur mbi fushën ajrore.
Guvernatori i Volgogradit, Andrei Bocharov, tha se sulmet me dronë shkaktuan zjarr në një objekt ushtarak në rajon, por pretendoi se sulmi është zmbrapsur.
Lexoni edhe këtë: Rusia thotë se ka zmbrapsur disa sulme ajrore të Ukrainës“Si pasojë e rrëzimit të UAV, një zjarr shpërtheu në territorin e objektit të Ministrisë. Zjarrfikësit shpejt filluan ta shuajnë zjarrin”, shkroi Bocharov në Telegram.
Ai tha se nuk ka viktima nga ky sulm.
Ndërkohë, gjatë vizitës në Sumi, Zelensky u takua me kryekomandantin e ushtrisë ukrainase, Oleksandr Syrskiy, nga i cili u njoftua për gjendjen operacionale në zonën e kontrolluar nga forcat ukrainase në Kursk të Rusisë, tha presidenca ukrainase.
Guvernatori i Sumit, Volodymyr Artyukh, i tha Zelenskyt se pas fillimit të operacionit të Ukrainës në Kursk, numri i granatimeve prej matanë kufirit dhe numri i viktimave civile kanë shënuar ulje dramatike. Kjo ka mundësuar gjithashtu që të fillojë puna e riparimeve në infrastrukturë, e cila ka qenë shumë e nevojshme pas bombardimeve të mëdha ruse, sipas njoftimit.
Udhëheqësit e Ukrainës kanë sqaruar vazhdimisht se vendimi i tyre për t’u futur në Kursk ka për qëllim krijimin e një zone të sigurisë brenda Rusisë, për t’i mbrojtur cilët ukrainase nga bombardimet ruse nga matanë kufirit.
Ukraina e ka mohuar gjithashtu se dëshiron të fitojë territor rus.