Disave do t’u kryenin punë, por nuk i kanë. Të tjerëve ua kanë zënë rrugën.
Dhjetëra pajisje mjekësore, të cilat janë shfrytëzuar gjatë pandemisë COVID-19, janë mbyllur në Qendrën Klinike Universitare të Kosovës për më shumë se dy vjet.
Radio Evropa e Lirë siguroi qasje në Klinikën e Mjekësisë Fizikale dhe të Rehabilitimit, ku pa se gjysma e katit të tretë është e mbushur me pajisje të pluhurosura - nga ato për oksigjen deri tek ato që përcjellin aktivitetin e zemrës.
Pajijse për raste emergjente spitalore.
Nga Shërbimi Spitalor Klinik dhe Universitar i Kosovës (SHSKUK), i cili mbikëqyr QKUK-në dhe spitalet rajonale, thonë se zgjidhja për këto pajisje do të gjendet “brenda javësh”, por nuk japin detaje se përse nuk është gjetur deri më tash.
“Ka përfunduar regjistrimi i pajisjeve. Nga njësitë bio-mjekësore është kërkuar që lista të shpërndahet në të gjitha njësitë në SHSKUK dhe aty ku ka nevojë, të dërgohen dhe të përdoren”, thotë për Radion Evropa e Lirë Elvir Azizi, drejtor i SHSKUK-së.
Më shumë se 30 respiratorë të ngjashëm që përdoren te pacientët pa vetëdije shihen të pa mirëmbajtur.
Radio Evropa e Lirë i kontaktoi disa nga spitalet rajonale të Kosovës për t’i pyetur nëse kanë nevojë për pajisjet që qëndrojnë jashtë funksionit në QKUK.
Duke i parë fotografitë e siguruara nga REL-i, një mjek në Spitalin e Përgjithshëm të Gjilanit konfirmoi se disa pajisje aty “mund t’i hynë në punë” këtij spitali, pa specifikuar më shumë.
Ngjashëm konfirmuan edhe në Spitalin e Prizrenit.
Ndërsa në Gjakovë thanë jo, mjekët në Vushtrri dhe në Mitrovicë të Jugut thanë se nuk janë të informuar për grumbullin e pajisjeve që nuk përdoren dhe se janë në pritje të regjistrit nga SHSKUK-ja.
Të tjerë respiratorë që nuk përdoren në Qendrën Klinike Universitare të Kosovës.
Duke folur për Radion Evropa e Lirë, disa mjekë të Klinikës së Mjekësisë Fizikale dhe të Rehabilitimit thanë se “bllokimi i një pjese të katit të tretë me pajisje, e pengon mbarëvajtjen e punës” së kësaj klinike.
Veç aparaturës së përdorur, aty gjenden edhe paketime me pajisje të reja, me të cilat furnizohen klinikat brenda Qendrës Klinike Universitare të Kosovës.
Aparat për inhalim, dhjetëra pako të tilla janë duke qëndruar në depon e improvizuar.
Kjo qendër nuk ka një depo të caktuar për ruajtjen e pajisjeve rezervë, apo atyre të përdorura, e që për momentin nuk përdoren.
Koncentator i oksigjenit. Aparati i pamirëmbajtur dhe i pluhurosur
Para 2020-ës, disa të tilla rezervë janë ruajtur në bodrumin e Klinikës së Pulmologjisë, por janë larguar prej aty, pasi disa prej tyre janë dëmtuar nga vërshimet.
Defibrilator që përdoret për raste shoku.
Shumë prej pajisjeve që qëndrojnë në Klinikën e Mjekësisë Fizikale kanë qenë donacione për Kosovën, por ka edhe syresh që janë blerë vetë nga Ministria e Shëndetësisë dhe SHSKUK-ja.
Aparat për analiza Gem 3500, donacion nga Amerika.
Pas shpërthimit të pandemisë COVID-19 në vitin 2020, Ministria e Shëndetësisë ka pranuar donacion nga Japonia me rreth 20 pompa shiringash dhe 10 elektrokardiograma, që tani nuk përdoren më.
Këto ishin pjesa e parë e pajisjeve nga Japonia, vlera totale e të cilave arriti shumën prej rreth 810.000 eurosh.
Pas këtij donacioni, Kosova ka përfituar edhe të tjera.
Pajisje me ekran-pulsa oksimetri.
Vala e pandemisë COVID-19 e ka goditur Kosovën gjatë një periudhe më 2020 dhe një tjetre më 2021. Raste më të rralla kanë vazhduar edhe në vitet pasuese.
Sipas të dhënave të Ministrisë së Shëndetësisë në Kosovë, mbi 3 mijë persona kanë humbur jetën pasi janë prekur nga sëmundja COVID-19, e shkaktuar nga një koronavirus.
Radio Evropa e Lirë, edhe më herët, ka raportuar për sistemim jo të duhur të pajisjeve mjekësore nëpër klinikat dhe spitalet e SHSKUK-së.
Lexoni edhe:
- Në kushte të mjera, Pediatria në Mitrovicë të Jugut pret objektin e ri
- Aparatura "me tepricë" në QKUK