Sukseset në sport dhe në kulturë kanë dominuar ngjarjet pozitive të Kosovës gjatë vitit 2021. Xhudo u bë sërish lajmi kryesor i vitit. Distria Krasniqi dhe Nora Gjakova fituan medalja të arta në Lojërat Olimpike Verore “Tokio 2020”. Por, sukses pati edhe filmi kosovar. Filmi “Zgjoi” me regji të Blerta Bashollit, fitoi shumë çmime dhe është në garë të ngushtë për të fituar çmim Oscar. Një nga sukseset kryesore në politikë ishte vendosja e marrëdhënieve diplomatike në mes të Kosovës dhe Izraelit.
Your browser doesn’t support HTML5
Çka e gëzoi Kosoven më 2021?
Kosova dhe Izraeli vendosin marrëdhënie diplomatike
Në aspektin diplomatik Kosova nuk arriti ndonjë sukses të madh gjatë vitit 2021. Kjo edhe për shkak edhe të marrëveshjes së Uashingtonit, ku në muajin shtator të vitit 2020, delegacioni i Kosovës i prirë nga ish-kryeministri Avdullah Hoti dhe delegacioni serb i prirë nga presidenti i Serbisë Aleksandar Vuçiq u pajtuan për një moratorium njëvjeçar që obligonte Kosovën të ndalonte përpjekjet për të siguruar njohje të reja si dhe të pezullonte përpjekjet për anëtarësim në organizata ndërkombëtare, ndërkohë që Serbia obligohej të ndalonte fushatën për t’i bindur shtetet e ndryshme të botës që të tërheqin njohjen e shtetit të Kosovës. Por me 1 shkurt 2021, Kosova dhe Izraeli formalizuan marrëdhëniet diplomatike, vendim i cili nga të dyja shtetet u cilësua si "historik". Nënshkrimi i marrëdhënieve diplomatike u bë gjatë një ceremonie virtuale ku të dyja vendet o zotuan të rrisin bashkëpunimin.
Your browser doesn’t support HTML5
Ceremonia e vendosjes së marrëdhënieve diplomatike mes Kosovës dhe Izraelit
“Zgjoi” i Kosovës
Historia e Fahrije Hotit, një gruaje nga Krusha e Madhe e Rahovecit, që është në kërkim të burrit të saj të humbur në luftën e fundit në Kosovës, preku ndjenjat e qindra-mijëra shikuesve të filmit “Zgjoi”. Ky film fitoi disa nga çmimet kryesore të Sundance Film Festival, një nga festivalet më të njohura të filmit. Më 3 shkurt 2021, filmi artistik “Zgjoi” me regji të Blerta Bashollit fitoi tri çmimet kryesore: Filmi më i mirë, Regjisorja më e mirë dhe Çmimi i Publikut. Sundance Film Festival është festivali më i madh i filmit të pavarur në Shtetet e Bashkuara të Amerikës.
Aktorja Yllka Gashi në një nga skenat e filmit "Zgjoi".
Administrimi i vaksinave të para
Kosova kishte mbetur shumë pas krahasuar me shtetet e rajonit sa i takon furnizimit me vaksina kundër koronavirusit. Vaksinat e para arritën më 28 mars, ndërkohë që vetëm një ditë më pas filloi fushata e vaksinimit. Vaksinat e para që arritën në Kosovë ishin të kompanisë AstraZeneca dhe i dhuroheshin Kosovës përmes programit COVAX, program i Kombeve të Bashkuara për shpërndarjen e vaksinave te shtetet me të ardhura të ulëta. Fillimisht u bë vaksinimi i punëtorëve shëndetësorë, për të vazhduar javët më pas me grupmoshat më të rrezikuara.
Vaksinimi i të moshuarve në Prishtinë.
Netflix njeh Kosovën
Platforma Netflix deri vonë nuk e kishte të përfshirë Kosovën në listën e shteteve. Për ta bindur këtë kompani që ta fusë Kosovën në listë, u organizua një fushatë disamujore për mbledhjen e nënshkrimeve. Në fund u mblodhën 37 mijë nënshkrime dhe në muajin prill, Netflix iu përgjigj pozitivisht kërkesës duke shtuar Kosovën në platformën e saj me kodin telefonik +383.
Një person duke shikuar platformën Netflix.
Sërish xhudo
Në Lojërat Olimpike Verore “Tokio 2020” që u zhvilluan në Japoni, xhudistja Distria Krasniqi fitoi medalje të artë më 24 korrik. Medalja olimpike për Distria Krasniqin pasoi shumë suksese të saj në gara të ndryshme, përfshirë kampionate evropiane e botërore. Medalja e saj olimpike u bë e dyta që xhudo i kishte sjellë Kosovës pas suksesit të Majlinda Kelmendit në gushtin e vitit 2016 në kuadër të Lojërave Olimpike “Rio 2016”.
Distria Krasniqi pasi mposhti xhudisten Laura Martinez Abelenda.
E arta e Norës
Vetëm dy ditë pas suksesit të Distria Krasniqit, xhudistja tjetër, Nora Gjakova, gëzoi shqiptarët pasi më 26 korrik fitoi medaljen e artë olimpike. Në një garë të fortë në finale, në kategorinë deri në 57 kilogramë, Nora e mposhti francezen Sarah-Léonie Cysique. Medalja e Norës ishte medalja e dytë e artë që Kosova r fitoi në Lojërat Olimpike “Tokio 2020”.
Nora Gjakova pasi fitoi në gjymsëfinale në Tokio të Japonisë.
Të artat e Kosovës kthehen në atdhe
Në kryeqytetin e Kosovës, Prishtinë, më 2 gusht u organizua pritje për ekipin e xhudos pas pjesëmarrjes në Lojërat Olimpike “Tokio 2020”. Dy xhudistet e Kosovës, Distria Krasniqi dhe Nora Gjakova, morën dy medalje të arta në këto lojëra. Në “Tokio 2020”, Kosovën e përfaqësuan 11 atletë në gjashtë sporte.
Your browser doesn’t support HTML5
Të artat e Kosovës kthehen në atdhe
Shpërblehen filmat nga Kosova
Filmat nga Kosova arritën sukses në festivale të ndryshme gjatë vitit 2021. Tre filma nga Kosova fituan çmime të rëndësishme në Festivalin e Filmit në Sarajevë (SFF). Çmimi “Zemra e Sarajevës” për aktoren më të mirë e fituan aktoret e filmit “Luaneshat e Kodrës”: Flaka Latifi, Era Balaj dhe Urata Shabani. Çmimi për promovimin e barazisë gjinore iu dha Norika Sefës për filmin “Në kërkim të Venerës”. Ndërkaq, mirënjohja e veçantë e jurisë iu nda filmit “Pa vend” me regji nga Samir Karahoda. Ceremonia e ndarjes së këtyre çmimeve u mbajt në qytetin e Sarajevës më 19 gusht.
Edicioni i 27-të i Festivalit të Filmit në Sarajevë të Bosnje e Hercegovinës.
SHBA-ja dhuron gjysmë milion vaksina për Kosovën
Dërgesa e vaksinave për Kosovën.
Si shumë shtete të tjera me të ardhura të ulëta në botë, edhe Kosova u përball me mungesë të vaksinave gjatë pjesës së parë të vitit 2021. Ndonëse mori vaksina nga programi i Kombeve të Bashkuara, COVAX, numrin më të madh të vaksinave Kosovës ia fali SHBA-ja. Më 20 gusht, SHBA-ja ia dhuroi Kosovës kontingjentin e parë nga mbi gjysmë milioni doza të vaksinës Pfizer. Ky donacion paraqet donacionin më të madh të vaksinës kundër COVID-19 që ndonjë vend apo organizatë ia ka dhuruar Kosovës.
“Zgjoi” s’i ndal sukseset
Në fund të muajit tetor, filmi “Zgjoi” iu rikthye sukseseve. Këtë herë filmi “Zgjoi” nga Blerta Basholli fitoi dy çmimet kryesore në edicionin e 66-të të “Valladolid International Film Festival” në Spanjë. Aktorja në rolin kryesor, Yllka Gashi, u zgjodh aktorja më e mirë, ndërsa “Zgjoi” fitoi çmimin “Fundos”.
Fotografi nga xhirimet e filmit "Zgjoi".
Distria, më e mira në botë
Se viti 2021 ishte një sukses i jashtëzakonshëm për xhudisten Distria Krasniqi u konfirmua më 18 dhjetor, kur Federata Ndërkombëtare e Xhudos e shpalli atë si xhudisten më të mirë të vitit 2021. Përzgjedhja e saj u bë përmes një votimi të organizuar nga Federata Ndërkombëtare e Xhudos.
Distria Krasniqi duke festuar suksesin së bashku me trajnerin e saj Driton Kuka.
Driton Kuka, më i miri në botë
Trajneri i xhudisteve më të suksesshme të Kosovës, Driton Kuka, u shpall trajneri më i mirë në botë më 18 dhjetor nga Federata Botërore e Xhudos. Përveç shumë çmimeve në kampionate të ndryshme evropiane e botërore, xhudistët që i ka trajnuar Driton Kuka arritën t’i sjellin Kosovës tri medalje të arta olimpike - Majlinda Kelmendi në vitin 2016 si dhe Distria Krasniqi dhe Nora Gjakova në vitin 2021.
Në anën e djathtë, me maskë të bardhë, trajneri Driton Kuka dhe në anën tjetër kryetari i Federatës së Xhudos së Kosovës, Agron Kuka.
“Zgjoi” më pranë nominimit për Oscar
Pas shumë sukseseve në festivale të filmit, “Zgjoi”, është futur në listën e ngushtë për nominim për çmimin prestigjioz Oscar. “Zgjoi” bën pjesë në listën e ngushtë të 15 filmave ndërkombëtarë për edicionin e 94-të të Çmimit Oscar. Filmi që është frymëzuar nga historia e vërtetë e Fahrije Hotit nga Krusha e Madhe, e cila në kërkim të burrit të saj të humbur gjatë luftës në Kosovë, fillon një biznes bujqësor për ta siguruar mbijetesën e familjes, ka marrë vlerësim mjaft pozitiv nga kritikët e filmit.
Regjisorja e filmit "Zgjoi", Blerta Basholli.