Ambasada amerikane në Shqipëri ngriti alarmin për një kërcënim të mundshëm që shënjestron një samit të organizuar nga opozita e Iranit në mërgim, që ishte planifikuar të mbahej në Durrës më 23 dhe 24 korrik.
Për shkak të këtij paralajmërimi, organizatorët kanë njoftuar se samiti është shtyrë deri në një njoftim të dytë.
“Qeveria e Shteteve të Bashkuara është në dijeni të një kërcënimi të mundshëm, i cili ka në shënjestër takimin botëror të nivelit të lartë të Iranit të lirë, që do të mbahet pranë Durrësit nga 23 deri më 24 korrik”, thuhej në njoftimin e Ambasadës, përmes së cilit udhëzohen qytetarët amerikanë që ta shmangin këtë ngjarje.
Samiti ishte paraparë të organizohej nga Këshilli Kombëtar i Rezistencës së Iranit (NCRI) dhe Organizata e Muxhahedinëve të Popullit të Iranit (MEK), që të dyja grupe që avokojnë përmbysjen e Qeverisë së Iranit.
Në Shqipëri, pranë qytetit të Durrësit, prej vitit 2016 strehohen rreth 3.000 anëtarë të organizatës MEK.
Në samitin, që tashmë është shtyrë, sipas organizatorëve, ishte paraparë që të merrnin pjesë qindra politikanë dhe deputetë të njohur nga të dyja anët e Atlantikut dhe më gjerë. Po ashtu ishte paraparë që mijëra iranianë t'i bashkoheshin ngjarjes përmes platformave online.
Kryeministri i Shqipërisë, Edi Rama, të enjten ka thënë se Shqipëria ka qenë cak i një sulmi kibernetik nga një shtet jomiqësor, i cili ka shënjestruar të gjitha portalet qeveritare dhe portalin e shërbimeve e-Albania.
SHIKONI EDHE: Rama: Sulmi kibernetik ndaj Shqipërisë vjen nga një shtet tjetërAutoritetet e Shqipërisë ende nuk e kanë komentuar nëse bëhet fjalë për të njëjtin kërcënim.
Në janar të vitit 2020, autoritetet shqiptare urdhëruan dëbimin e dy diplomatëve iranianë, të cilët u shpallën persona të padëshiruar, pasi një prej tyre dyshohej se ishte anëtar i Gardës Revolucionare të Iranit, ndërsa tjetri pjesë e njësisë operacionale të shërbimeve sekrete iraniane.
SHIKONI EDHE: DASH lavdëron Shqipërinë për dëbimin e dy diplomatëve iranianëKampi Ashraf pranë Durrësit u vizitua një muaj më parë nga ish-nënpresidenti amerikan, Mike Pence, ndërsa në muajin maj këtë kamp e kishte vizituar edhe ish-sekretari amerikan i Shtetit, Mike Pompeo.